Ուզբեկստանի էներգետիկայի նախարարությունը դատապարտել է «գազային միության» ռուսական առաջարկը։ Տաշքենդը չի համաձայնել քաղաքական պայմաններին, որոնք կվտանգեն ազգային շահերը։ Reuters-ի փոխանցմամբ՝ Ուզբեկստանը դեռ կոնկրետ առաջարկ չի ստացել, ինչպես նախօրեին ասել էր Ուզբեկստանի նախարար Ժուրաբեկ Միրզամախմուդովը։
«Եթե նույնիսկ Ռուսաստանի հետ գազային պայմանագիր կնքվի, դա չի նշանակում դաշինք»,- ասել է նա։ Բանակցություններ էին ընթանում Ղազախստանով անցնող խողովակաշարով ռուսական գազի մատակարարման շուրջ, սակայն դա լինելու է «տեխնիկական պայմանագիր», այլ ոչ թե դաշինք։
«Եթե մենք գազ ենք ներկրում այլ երկրից, ապա համագործակցում ենք միայն առքուվաճառքի համաձայնագրի հիման վրա, մենք երբեք չենք համաձայնի քաղաքական պայմանների՝ գազի դիմաց»,- ընդգծել է նախարարը։
Reuters-ը գրում է, որ ռուսական առաջարկի նկատմամբ Ուզբեկստանի սառը վերաբերմունքն արտացոլում է այն հանգամանքը, որ Ուկրաինայում պատերազմի ֆոնին Մոսկվայի համար դժվար է իր կամքը պարտադրել նախկին խորհրդային մյուս հանրապետություններին։
Պարզվել է, որ «գազային դաշինքի» դիմաց Ռուսաստանը Ուզբեկստանին առաջարկել է իրեն փոխանցել ազգային էլեկտրացանցերը։
«Այստեղ մենք բանակցում ենք ազգային շահերից ելնելով, որպեսզի համագործակցենք առևտրային պայմանագրի, առքուվաճառքի, այլ ոչ թե մեր էներգետիկ ցանցերի փոխանցման միջոցով», – ասել է Միրզամախմուդովը, հայտնում է Gazeta.uz-ը:
Ղազախստանի նախագահ Կասիմ-Ժոմարտ Տոկաևն առաջին անգամ «եռյակ գազային միություն» ստեղծելու նախաձեռնության մասին հայտարարել է նոյեմբերի 28-ին ՌԴ վարչապետ Միխայիլ Միշուստինի հետ հանդիպմանը։ Այնուհետեւ նա նշել է, որ նախաձեռնությունը եղել է Ռուսաստանի ղեկավարից։ «Այսօր Վլադիմիր Վլադիմիրովիչն ասաց, որ մենք պետք է ստեղծենք մի տեսակ եռակողմ միություն։ Այս թեմայով նա պատրաստվում է զանգահարել Ուզբեկստանի նախագահին։ Մենք նույնպես պետք է խորանանք այս թեմայի մեջ»,- ասել էր Տոկաևը:
Ինչպես նշում է Reuters-ը, ցուրտ ձմռան ֆոնին Ուզբեկստանը վառելիքի դեֆիցիտ է զգում և նույնիսկ ստիպված է եղել դադարեցնել օրական 6 մլն խմ գազի արտահանումը Չինաստան։
Մինչ Մոսկվայի նախկին արբանյակները ինքնիշխանության ընդլայնման ճանապարհն են բռնել, ՀՀ իշխանությունները տարիներ շարունակ կատարում էին ու կատարում են Մոսկվայի քմահաճույքները՝ երկրի կենսական ենթակառուցվածքները, բանակը ՌԴ-ին հանձնելով։ Ներկայում ՀՀ իշխանությունը կատարում է արդեն պետական ինքնիշխանությունը հանձնելու Մոսկվայի ցանկությունը։
