A1News.am-Վարունգի կանոնավոր օգտագործումը սովորաբար խորհուրդ է տրվում նրանց, ովքեր ցանկանում են նիհարել՝ համարվում է, որ վարունգն ունի, այսպես կոչված, բացասական կալորիականություն, ինչպես նաեւ օգնում է մաքրել օրգանիզմը եւ կարգավորել մարսողական տրակտի աշխատանքը:
Ինչպես գրում է «ՌԻԱ Նովոստին», եթե մարդը օրական ուտում է թեկուզ մեկ վարունգ, նրա մաշկի վիճակը նկատելիորեն բարելավում է, այտուցները նվազում են:
Վարունգի 95%-ը ջուր է, մնացած հինգը՝ բջջանյութեր, ինչպես նաեւ պարունակում է տարտրոնաթթու, որը խոչընդոտում է ճարպի առաջացմանը: Բացի այդ, այն մարսելու համար օրգանիզմը ստիպված է լինում ավելի շատ կալորիաներ ծախսել, քան կարող է ստանալ վարունգից:
Վարունգի կեղեւը պարունակում է K, A, C վիտամիններ, փոքր քանակությամբ B խմբի վիտամիններ, ինչպես նաեւ օգտակար հանածոներ՝ երկաթ, կալիում, ֆոսֆոր, պղինձ եւ մագնեզիում, որոնք բարելավում են նյութափոխանակությունը, իջեցնում արյան մեջ շաքարի մակարդակը, մաքրում են անոթները խոլեստերինի կուտակումներից: Վարունգի պտղամիսը օգնում է նորմալացնել աղիքների աշխատանքը:
Համարվում է նաեւ, որ վարունգը մաշկը հագեցնում է խոնավությամբ, վերացնում է ցանն ու կարմրությունը, հարթեցնում է մանր կնճիռները: Վարունգի մեջ պարունակվող ֆիսետինները բարելավում են հիշողությունը եւ նվազեցնում Ալցհեյմերի հիվանդության զարգացման ռիսկը:
Ում է հակացուցված վարունգը
Այնուամենայնիվ, որոշ մարդկանց վարունգը կարող է հակացուցված լինել, այսպես՝ խորհուրդ չի տրվում այն օգտագործել աղեստամոքսային տրակտի հիվանդությունների դեպքում, ինչպիսիք են խոցը, գաստրիտը, կոլիտը, քանի որ հյութը կարող է բարձրացնել ստամոքսի թթվայնության մակարդակը, իսկ չափից շատ օգտագործումը կարող է ձգել այն:
