A1News.am-«Անհրաժեշտություն է առաջացել լրացուցիչ միջոցներ հատկացնել՝ երեխա ունեցող ընտանիքներին բնակարանային ապահովության պետական աջակցության 2020-2023թթ ծրագրին:
Ծրագիրն ունի երեք բաղադրիչ, առաջին՝ միանվագ դրամական աջակցություն է տրամադրվում մարզային բնակավայրերում հիպոթեքային վարկով բնակարան ձեռք բերելու համար կամ անհատական բնակելի տուն կառուցելու նպատակով:
Երկրորդ՝ հիպոթեքով բնակարան ձեռք բերող շահառուին տրամադրվում է դրամական աջակցություն՝ տարեկան ապահովագրական վճարը վճարելու համար ու երրորդ՝ հիպոթեքային վարկ մարող ընտանիքում երեխա ծնվելու դեպքում ընտանիքին տրվում է միանվագ աջակցություն»,- Կառավարության նիստի ժամանակ հայտարարեց Աշխատանքի և սոցիալական հարցերի նախարար Նարեկ Մկրտչյանը՝ հավելելով, որ ծրագրի մեկնարկից ի վեր օգտվել է 3250 շահառու ընտանիք.
պետության մասնակցությունը մոտ 2,2 մլրդ դրամ է. նախատեսվում է, որ այս տարի ծրագրից կօգտվի 2500 շահառու ընտանիք: «Այն, որ այսօր այս որոշումն ընդունում ենք, չափազանց լավ լուր է»,- հավելեց Փաշինյանը: