A1News.am-Երբ Հայաստանն ու Ադրբեջանը շարունակում են Կովկասում կայունացման լուծման ուղիներ փնտրել, ՀԱՊԿ-ը պատրաստ է օգնել այդ հարցում։ Այս մասին հայտարարել է Ռուսաստանի ԱԳ նախարար Սերգեյ Լավրովը հեռուստալրագրող Դմիտրի Կիսելյովին տված հարցազրույցում։
Նա նաև նշել է, որ Հայաստանում ՀԱՊԿ առաքելություն տեղակայելու Ռուսաստանի առաջարկը դեռ արդիական է․
«Երբ Հայաստանը և Ադրբեջանը շարունակում են ելքեր փնտրել Կովկասում իրավիճակը կայունացնելու համար ՀԱՊԿ -ն նույնպես պատրաստ է օգնել: Անցյալ տարվա սեպտեմբերին բռնությունների մեկնարկից հետո Երևանը դիմել էր կազմակերպությանը։ ՀԱՊԿ գլխավոր քարտուղարը մեկնել է հայ-ադրբեջանական սահման, ներկայացրել ՀԱՊԿ առաքելությունը Հայաստանի՝ Ադրբեջանի հետ սահմանակից հատվածներում ծավալելու ծրագիրը: Այն պատրաստ էր դեռ վաղուց, բայց արդյունքում, Երևանում կայացած գագաթնաժողովում հայ գործընկերներն ասացին, որ իրենց այդ որոշումը կյանքի կկոչվի միայն այն դեպքում, եթե դրանում կտրականապես դատապարտվեն Ադրբեջանի գործողությունները։ Ոչ բոլորն էին պատրաստ դա անել: Այս ղարաբաղյան հակամարտության պատմությունը գնում է խորը տասնամյակներ: Երկար-երկար տարիներ Հայաստանը օկուպացրել էր Ադրբեջանի յոթ շրջանները։
Ռուսաստանը դիվանագիտական լուծման բազմաթիվ տարբերակներ էր առաջարկում, որոնք Հայաստանի դեռ նախկին իշխանություններն այնքան էլ դրական չէին ընկալում՝ ցանկանալով պահել այն տարածքները, որոնց Հայաստանը երբեք չի հավակնել։ Ուստի Ադրբեջանը վերադարձրեց այն հողերը, որոնք իրեն էին պատկանում: Ռուսաստանը քաղաքական ճանապարհով խնդիրը լուծելու բազմաթիվ առաջարկներ է արել։ Առաջարկը դեռ սեղանին է, և եթե մեր հայ դաշնակիցներն ու ընկերները դեռ հետաքրքրված են դրանով, ապա այդ առաքելությունը կարող է տեղակայվել ընդամենը մեկ կամ երկու օրվա ընթացքում»։
