Ավտովթար է տեղի ունեցել Երևանում

A1News.am-Այսօր`դեկտեմբերի 4-ին, մոպեդի և ավտոմեքենաների բախում է տեղի ունեցել Երևանում։ Ժամը 20։00-ի սահմաններում Կասյան փողոցում՝ Բարեկամության էստակադայի վրա, բախվել են BMW մակնիշի Piloyan համարանիշի ավտոմեքենան, Opel-ը և Hayasa մակնիշի մոպեդը։

Ինչպես դեպքի վայրից հայտնում է ֆոտոլրագրող Գագիկ Շամշյանը, բախման հետևանքով մոպեդը կողաշրջվել է, մոպեդավարն էլ մարմնական վնասվածքով տեղափոխվել է «Արմենիա» ԲԿ։

Վիրավորին առաջինն օգնության են հասել BMW-ի և Opel-ի վարորդները և օպերատիվորեն ժամանած շտապօգնության բժիշկների հերթապահ խումբը։ 

Երթևեկությունը նշված վայրում ժամանակավորապես դադարեցվել է։ 

Պարեկային ծառայությունն ու քննչական բաժինը պարզում են ավտոմեքենաների վարորդների և մոպեդավարի ինքնությունը։

Ըստ նախնական տեղեկությունների, մեղավորը եղել է մոպեդավարը, ով նախ բախվել է Opel-ին, ապա BMW-ին և կողաշրջվել։

BMW-ի և Opel-ի վարորդները տեղում  ենթարկվել են սթափության փորձաքննության, նրանք եղել են սթափ։