Այսօր՝ մարտի 1-ին, արտակարգ դեպք է տեղի ունեցել Արագածոտնի մարզում։ Ժամը 11։45 ՀՀ ներքին գործերի նախարարության Փրկարար Ծառայության 911 ճգնաժամային կառավարման ազգային կենտրոն ահազանգ է ստացվել, որ Երևան-Վանաձոր ավտոճանապարհի Արտաշավան գյուղի վարչական տարածքում գտնվող «Տառերի պուրակի» հարևանությամբ ավտոմեքենա է այրվում։
Ինչպես դեպքի վայրից հայտնում է ֆոտոլրագրող Գագիկ Շամշյանը, օպերատիվորեն ժամանել են ՀՀ ՆԳՆ ՓԾ Արագածոտնի մարզային փրկարարական վարչության հրշեջ-փրկարարական ջոկատը 1 մարտական հաշվարկով՝ մարզային փրկարարական վարչության պետի և տեղակալի գլխավորությամբ։
Հրշեջ-փրկարարները մարել են Honda Fit մակնիշի ավտոմեքենայում առաջացած հրդեհը, սակայն ավտոմեքենան ամբողջությամբ վերածվել է մոխրակույտի։
Պարեկներն ու ոստիկանները պարզել են, որ առաջացած կրակի հետևանքով ավտոմեքենայի վարորդ 50-ամյա Նորայր Աբաջյանը այրվածքներ է ստացել դեմքի հատվածում, ինչից հետո բուժօգնության է դիմել Երևանի «Այրվածքաբության կենտրոն»։
Դեպքի փաստով Ոստիկանության Աշտարակի բաժնում նյութեր են նախապատրաստվում։