A1News.am-Այսօր՝ հունիսի 16-ին, մոտոցիկլի և տրակտորի բախում է տեղի ունեցել Սյունիքի մարզում: Ժամը 14:00-ի սահմաններում Երևան-Երասխ-Մեղրի ավտոճանապարհի 197-րդ կմ հատվածում Գերմանիայի Ֆեդերատիվ Հանրապետության քաղաքացի, 65-ամյա Մագնուս Կ.-ն իր վարած BMW ՕԼQK 37 մակնիշի մոտոցիկլետով դուրս է եկել հանդիպակաց երթևեկելի գոտի և բախվել նույն ուղեմասով երթևեկող, Սյունիքի մարզի բնակիչ, 72-ամյա Հենրիկ Մ.-ի վարած, ձախ շրջադարձ կատարող ՄՏԶ 52 մակնիշի տրակտորի հետևի ձախ անվադողին:
Ինչպես հայտնում է ֆոտոլրագրող Գագիկ Շամշյանը, բախման հետևանքով մոտոցիկլը կողաշրջվել է, իսկ մոտոցիկլավար Մագնուս Կ.-ն մարմնական վնասվածքներվ տեղափոխվել է «Սիսիան» բժշկական կենտրոն: Վիրավորին առաջինը օգնության են հասել գյուղացիները և օպերատիվ է գործել բժիշկների հերթապահ խումբը, ովքեր մինչև հիվանդանոց տեղափոխելը, տեղում առաջին բուժօգնությունն են ցուցաբերել:
Օպերատիվորեն ժամանել են ճանապարհային ոստիկանության 2-րդ սպայական գումարտակի 6-րդ վաշտի 1-ին դասակի ծառայողները՝ վաշտի հրամանատար Վաչե Ալավերդյանի, դասակի հրամանատար Կարեն Օհանյանի գլխավորությամբ: Դեպքի վայր է ժամանել նաև ոստիկանության Սիսիանի բաժնի պետ Դավիթ Պետրոսյանը:
Տեղում հետաքննական աշխատանքները ղեկավարել է ՃՈ 2-րդ սպայական գումարտակի 6-րդ վաշտի ավագ հետաքննիչ Սուրեն Վարդանյանը, ում կողմից վթարի փաստով նյութեր են նախապատրաստվում:
