A1News.am-Lragir.am-ը գրում է. Դատելով Բաքվի ԶԼՄ-ների հրապարակումներից՝ այս երկրի ղեկավարությունը չէր սպասում, թե ինչ տարափ կառաջացնի Ռուսաստանի կողմից հրահրված «միջանցք ճեղքելու» փորձը։ Բաքվի լրատվամիջոցները նախընտրում են չգրել այն մասին, որ երեկ ՄԱԿ-ի Անվտանգության խորհրդի գրեթե բոլոր մշտական անդամները ճանաչել են Ադրբեջանի ագրեսիան և պահանջել վերադառնալ իրենց նախկին դիրքերին, իսկ Չինաստանի ներկայացուցիչն անսպասելիորեն հայտարարել է, որ հայ-ադրբեջանական հարաբերությունները կապված են ղարաբաղյան հակամարտության հետ։
Բաքուն տարակուսած է ոչ միայն Մակրոնի և Բլինկենի կողմից Հայաստանի բացահայտ աջակցությամբ, ոչ միայն նրանով, որ Հայաստանը սկսեց բացահայտ հարցեր տալ ՀԱՊԿ-ի ու ռուսական «անվտանգություն» մասին, այլ նաև այն փաստից, որ ԱՄՆ Կոնգրեսի Ներկայացուցիչների պալատի նախագահ Նենսի Փելոսին գալիս է Հայաստան։
Փելոսիի Թայվան կատարած այցին աշխարհում հետեւում էին շունչը պահած։ Փելոսին «ձիու վրա» դուրս եկավ «Թայվանի ճակատամարտից», և այս հաղթական ձիով որոշեց ժամանել Երևան։ Բաքուն տարակուսած է Հայաստանի սահմանների և միջանցքների ինքնիշխանության վերաբերյալ ԱՄՆ-ի և Իրանի հայտարարությունների լիակատար համընկնումից։
Նրանք ակնհայտորեն չէին սպասում, որ Փաշինյանը Սամարղանդ չի գնա, և, իհարկե, Սամարղանդում Էրդողանն ու Ալիևը տհաճ հարցեր կտան Պուտինին։ Պուտին-Էրդողան՝ օգոստոսի 5-ի առաջին պակտն ավարտվեց «հացահատիկային գործարքով»՝ Ռուսաստանի կողմից Բերձորի միջանցքը թուրքերին հանձնելու դիմաց, երկրորդը՝ «Զանգուզուրի միջանցքի» փոխանակումը Զապորոժյեի ատոմակայանի գործարքի հետ, անսպասելիորեն տապալվեց: Ինչպես Ալեն Սիմոնյանն ասաց՝ ԱՄՆ-ի օգնությամբ։
Մոսկվայի ու Բաքվի քարոզչությունը չի կարողացել համաշխարհային հանրությանը «համոզել», որ Ադրբեջանը իբր պատասխանում է հայերի «սադրանքներին», եւ հայերն են մեղավոր, որ սահմանազատում չեն անում։ Մոսկվան, որը նախկինում օգնում էր Բաքվին արդարացնել էքսպանսիան, այժմ ինքն էլ ծանր վիճակում է։
