Պեմզաշենում դաժանաբար սպանված Զարինե Մելիքսեթյանի ամուսինը` Սևակ Մելիքսեթյանը, դեկտեմբերի 7-ի գիշերը ԲՄՎ x 5 մակնիշի մեքենայով գնացել է Վրույր Բարսեղյանի տան մոտ, բացել բակի դուռը, ներս մտել ու իր մոտ եղած կացնով փորձել է կոտրել նրանց տան դուռը։
Սևակ Մելիքսեթյանի գործողությունները կանխել են տեղում հսկողություն իրականացնող ոստիկանները։ Տանը եղել է Վրույր Բարսեղյանի մայրը: Կացինն առգրավել են, Սևակ Մելիքսեթյանին ոստիկանությունից ազատ են արձակել։ Ոստիկանության լրատվական ծառայությունից մեր տեղեկությունը հաստատեցին։
«Դեկտեմբերի 7-ին ժ. 00.44-ին Շիրակի մարզի Պեմզաշեն գյուղում ծառայություն կատարելու ընթացքում, ոստիկանության ծառայողները նկատել են, որ կանգառ կատարած մեքենայից քաղաքացին իջնելով, վազելով մոտեցել, ոտքով հարվածել, բացել է մի տան բակ մտնող դուռը, մոտեցել է տան մուտքի դռանը և ձեռքին եղած կացնով փորձել է կոտրել տան մուտքի դուռը։ Սակայն նրա գործողությունները կանխվել են ծառայություն կատարող ոստիկանների կողմից:
Կացինը վերցվել է:
Կազմված փաստաթղթերն ուղարկվել են Արթիկի և Անիի քննչական բաժին քրեական վարույթ նախաձեռնելու հարցը քննարկելու համար»:
