A1News.am-«Հրապարակը» գրում է. Երեկ տեղեկացել էինք, որ ԱԻՆ փրկարար ծառայողները խմբով գնացել են Սյունիքի մարզի Ներքին Հանդ գյուղի տարածք` մեր զոհվածների դիերը բերելու։ Խմբի մի մասը վերադարձել էր, իսկ փրկարար ծառայողներից մեկի հետ մինչ այս պահը կապ հաստատել չի հաջողվել, որից հետո պարզ է դարձել, որ նրան ադրբեջանցիները գերի են վերցրել: Այսինքն՝ թշնամին միջազգային նորմ ու պայմանագիր չի ճանաչում, ոչ մի կարմիր գիծ եւ բարոյական արգելակ չունի եւ կարող է անգամ զինվորների դիերը բերելու համար սահմանին մոտեցած մասնագետներին, փրկարարներին, ովքեր մարդասիրական առաքելությամբ են այնտեղ գնացել, գերի վերցնել կամ սպանել։
Քանի որ անգամ պատերազմների ժամանակ նման մարդասիրական հարցերով զբաղվում են տարբեր կառույցներ եւ, մասնավորապես՝ Կարմիր խաչի ընկերությունները, մենք որոշեցինք հետաքրքրվել, թե ինչ է անում Հայկական կարմիր խաչի ընկերությունը եւ ինչու չի մասնակցում դիակները բերելու գործին կամ չի մոբիլիզացնում իր միջազգային լծակները՝ Ադրբեջանին սաստելու համար։ Այն, որ Կարմիր խաչը բավականին պասիվ է իր գործողություններում, դրա վառ ապացույցն այն է, որ ԱԻՆ-ն է այժմ դիեր վերադարձնելու հարցերով զբաղվում։ Իսկ 2020 թվականի պատերազմի շրջանում Կարմիր խաչն էր այդ հարցերով զբաղվում, կողմերի միջեւ միջնորդ հանդիսանում, որպեսզի դիեր փոխանակվեն, եւ որեւէ կողմ չտուժի:
Կարմիր խաչի գրասենյակի խոսնակ Զառա Ամատունուց հետաքրքրվեցինք, թե ինչու է կազմակերպությունը վերջին շրջանում պասիվացել, ինչու չի զբաղվում զինծառայողների դիերը փոխանակելու հարցերով եւ այլն։ Ամատունին մեր հարցին ի պատասխան նշեց. «Մենք երբեք անմիջապես նման հարցերով չենք զբաղվել, այլ զուտ չեզոք միջնորդ ենք հանդիսանում, որպեսզի կողմերը համաձայնության գան: Մենք զուտ մասնակցում ենք նման գործընթացներին, ինչպես, օրինակ, ղարաբաղյան դեպքերի ժամանակ: Ֆիզիկապես փնտրողը կողմերն են, այլ ոչ թե Կարմիր խաչը»։
Հարցին, թե ինչու այժմ միջնորդի դեր չեն ստանձնում, որպեսզի կողմերը համաձայնության գան, ինչով է պայմանավորված Կարմիր խաչի պասիվությունը, մեր զրուցակիցն ասաց. «Ինչո՞ւ եք ինձ հարցնում, հարցրեք Հայաստանի գործող իշխանություններին, որովհետեւ այս առումով մեր կազմակերպությունը շարունակում է բարձր մակարդակով քննարկումներ ունենալ իշխանությունների հետ, սակայն կոնկրետ գործողություններում մենք առնչություն չենք ունեցել։ Սակայն թե ինչու, այդ հարցը մեզ չպետք է ուղղեք: Կարմիր խաչը քաղաքական կազմակերպություն չէ, այլ մարդասիրական չեզոք կազմակերպություն է: Կարմիր խաչի միջազգային կոմիտեն քննարկում է եւ այժմ երկխոսության մեջ է կողմերի հետ՝ վերջին իրադարձությունների հետ կապված»։ Սակայն մեր զրուցակիցը չպարզաբանեց, թե ինչում է արտահայտվում ՀՀ իշխանություններից իրենց դժգոհությունը:
