A1News.am-Շուրջ երկու տարի անհետ կորած համարվող ժամկետային զինծառայող Նորիկ Մկրտչյանի կողմից զորամասն ինքնակամ լքելու փաստով հարուցված քրեական գործը 5 ամիս առաջ կասեցվել է։ Տեղեկությունը News.am-ին հայտնեց փաստաբան Լուսինե Վիրաբյանը։
«Քննիչի որոշմամբ՝ 2022 թվականի սեպտեմբերին գործը կասեցվել է մեղադրյալի վայրն անհայտ լինելու պատճառով, այսինքն՝ իրենք «փնտրել են» Նորիկին ու չեն գտել, ըստ քրեական դատավարության՝ եթե հետախուզման մեջ գտնվող մեղադրյալը չի գտնվում, գործի վարույթը կասեցվում է այնքան ժամանակ, քանի դեռ չի հայտնաբերվել մեղադրյալը»,– ասաց Լուսինե Վիրաբյանը։
Նորիկի մայրը՝ Լիլիթ Աղաբաբյանը News.am-ի հետ զրույցում նշեց՝ պատշաճ քննություն չի տարվել, անհրաժեշտ միջոցներ չեն ձեռնարկվել որդուն հայտնաբերելու ուղղությամբ։
«Ոչ մի բան չեն արել, դրա համար էլ առ այսօր երեխու գտնվելու վայրն անհայտ է։ Եթե իրենք չեն տեսել, որ Նորիկը լքել է զորամասը, ինչպե՞ս կարող էին այդ հատկանիշներով մեղադրանք առաջադրել նրան։
Ես չեմ հավատում, որ իմ տղան կարող էր փախչել զորամասից, հնարավոր չէ, որ ինքն ինձ հետ կապի դուրս չգար էդ դեպքում այս ամիսների ընթացքում։ Իսկ, եթե իմ երեխան փախել է, ապա թող գտնեն ու դատեն, ես համաձայն եմ, մենակ թե իմ երեխու շունչը բերանին տան ինձ»,– ասաց Լիլիթը։
Մայրը չի բացառում, որ որդին գերի է ընկել, կամ էլ ինչ–որ բան է տեղի ունեցել Նորիկի ու ծառայակիցների միջեւ, որից հետո նրան սպանել են ու փորձում են կոծկել գործը։
«Կարող է սպաների, ծառայակիցների հետ խնդիրներ է ունեցել Նորիկը, ամեն ինչ էլ հնարավոր է։ Ինքն էդ բնավորությունը չուներ, որ ինձ ինչ–որ բան պատմեր։ Ես նրա հետ վերջին անգամ մայիսի 14–ին եմ զրուցել, ոչ մի արտառոց բան չեմ նկատել, ինքն անգամ չէր ասել, որ վատառողջ է։
Կրկնում եմ՝ իսկ եթե տղաս փախել է, թող գտնեն ու դատեն, բայց իմ երեխեն հնարավոր չէ փախչեր ու այս ընթացքում ինձ հետ կապի դուրս չգար, դա բացառվում է։ Դիրքի ավագի հետ առերեսման ժամանակ քննիչը չէր թողնում, որ նա խոսի, այնպես էր քննիչն իրեն պահում, ոնց էր ինքը ներկա եղել այնտեղ։
Նորմալ քննություն չարած՝ գործը կասեցնում են, ինչո՞ւ, եթե վարույթն իրականացնող մարմինը ցանկանար, ապա այս գործը վաղուց էր բացահայտել»,– նշեց անհետ կորած զինվորի մայրը՝ Լիլիթ Աղաբաբյանը։
Փաստաբան Լուսինե Վիրաբյանը նույնպես դժգոհ է նախաքննության ընթացքից.
«Քննությունը տարվել է ոչ թե այն ուղղությամբ, թե ինչ պայմաններում է անհետացել զինվորն ու որտեղ է այս պահին գտնվում նա, այլ այն, որ զինվորը փախել է ծառայության վայրից։ Զինվորին հնարավոր չէր հայտնաբերել, երեւի թե միայն տեղում գտնվողներին է հայտնի, թե ինչ է կատարվել նրա հետ։ Եթե մեկ, երկու ամիս, կամ մեկ տարի աշխատել են ու զինվորը չի հայտնաբերվել, ապա միգուցե մտածեին այն ուղղությամբ, որ զինվորը ոչ թե ինքնակամ լքել է ծառայության վայրը, այլ նրան սպանել ու պահել են, կամ նրան գերի են վերցրել, կամ մեկ այլ վարկած քննեին»։
2021թ.–ի մայիսի 18-ից անհետ կորած համարվող Նորիկ Մկրտչյանը մեղադրվում է զորամասն ինքնակամ լքելու մեջ։ Նախկին գլխավոր դատախազի խորհրդական Գոռ Աբրահամյանի փոխանցմամբ՝ Նորիկ Մկրտչյանի անհետացման փաստի առնչությամբ հարուցված եւս մեկ քրեական գործ կա՝ անփույթ վերաբերմունքը ծառայության նկատմամբ հոդվածի հատկանիշներով։
Նորիկի՝ ծառայության վայրից բացակայելու մասին ոստիկանություն հաղորդագրություն է ստացվել 2021 թվականի մայիսի 18–ին։ Ըստ դատախազության՝ մայիսի 18-ի դրությամբ, Նորիկը չի գտնվել թշնամական ուժերի հետ անմիջական շփման հատվածում: Նորիկն անհետացել է Գեղարքունիքի մարզի Կութ գյուղի դիրքերից։ Նա երեք ամսվա ծառայող էր, երբ անհետացել է։ Նա բանակ էր զորակոչվել 2021թ.-ի փետրվարի 8-ին։
Փաստաբան Լուսինե Վիրաբյանը ավելի վաղ NEWS.am-ի հետ զրույցում ասել էր, որ Նորիկի անհետացման մասին ընտանիքին զգուշացվել էր միայն մայիսի 18–ին։
Լուսինե Վիրաբյանը նշել էր նաեւ, որ հարուցված քրեական գործերով պատշաճ քննություն չի կատարվում։ Նրանք տեղեկություններ ունեին, որ Նորիկը դիրքեր բարձրանալիս վատառողջ վիճակում է գտնվել, եւ նրան երկու հոգով են բարձրացրել, իսկ մեկ ուրիշն էլ զենքն է բարձրացրել։
Փաստաբանի խոսքով՝ Նորիկի մայրը հարուցված քրեական գործի շրջանակում առերեսում է ունեցել միայն «կամբատի» եւ դիրքի ավագի հետ։ Ցուցմունք տված զինծառայողների տվյալները, ըստ Լուսինե Վիրաբյանի՝ հակասում են իրար։ Փաստաբանը կարծիք էր հայտնել, որ վարույթն իրականացնող մարմինը կամ շատ լավ գիտի՝ ինչ է եղել ու կոծկում է գործը, կամ անտարբեր են դեպքի առնչությամբ։
«Նորիկն ինքնուրույն չէր կարող լքել զորամասը ու տարիներ շարունակ թաքնվեր քննություննից, եւ այդ ընթացքում նրա ծնողները դիմեին բոլոր ատյաններին Նորիկին գտնելու համար։ Լավ, եթե ծնողն ու պետությունը չգիտեն՝ նրա գտնվելու վայրը, բա ո՞ւր գնաց 18–ամյա տղան, մենք հետախուզություն ունե՞նք, թե՝ ոչ»,– նշեց փաստաբանը։
Հիշեցնենք նաեւ, որ վարույթն իրականացնող մարմնի քննիչը դիմել էր Կարմիր Խաչին՝ Նորիկ Մկրտչյանի՝ գերեվարված լինելու մասին ճշտում կատարելու համար։ Վիրաբյանի խոսքով՝ պատասխան է ստացվել, որ նրա անունը գերիների ցանկում չկա։
