Այսօր՝ նոյեմբերի 29-ին, խոշոր ավտովթար է տեղի ունեցել Կոտայքի մարզում։ Ժամը 11։00-ի սահմաններում ЗИЛ 130 մակնիշի ավտոմեքենան Զովունի-Քանաքեռավան ավտոճանապարհի 2-րդ կմ հատվածում, Քանաքեռավան գյուղի Երևանյան խճուղու թիվ 1 հասցեի հարևանությամբ դուրս է եկել հանդիպակաց երթևեկելի գոտի, բախվել երկաթե արգելապատնեշներին և կողաշրջվել։
Ինչպես դեպքի վայրից հայտնում է ֆոտոլրագրող Գագիկ Շամշյանը, վթարի հետևանքով վարորդը արգելափակվել է ավտոմեքենայի մեջ, և նրան դուրս բերելու համար օպերատիվորեն ժամանել են Արտակարգ իրավիճակների նախարարության Փրկարար ծառայության Երևանի հրշեջ-փրկարարական ջոկատից 2 մարտական հաշվարկ։
Օպերատիվորեն ժամանել են նաև Եղվարդ քաղաքի հիվանդանոցի բժիշկների հերթապահ խումբը, ովքեր նախ տեղում առաջին օգնությունը ցուցաբերեցին վիրավորին, ապա պարանոցին տեղադրեցին ֆիքսատոր, կատարեցին անհրաժեշտ ներարկում ու տեղափոխեցին Երևանի «Արմենիա» բժշկական կենտրոն։
Վթարի փաստով Ս․ Բաբախանյանի կողմից նախաձեռնվել է վարույթ։
Ոստիկանությունն ու քննչական բաժինը պարզում են վարորդի ինքնությունը։
