A1News.am-Նոյեմբերի 6-ին խոշոր ավտովթար է տեղի ունեցել Սյունիքի մարզում։
Ժամը 14։15-ի սահմաններում «Մեղրի» բժշկական կենտրոնից ոստիկանության Մեղրիի բաժին ահազանգ է ստացվել, որ տարբեր աստիճանի մարմնական վնասվածքներով իրենց մոտ են տեղափոխվել Արմավիրի մարզի բնակիչներ՝ 46-ամյա Աննա Համբարյանը, 48-ամյա Աննա Ղևոնդյանը, 37-ամյա Զարուհի Աղամյանը, 31-ամյա Սուսաննա Մկրտչյանը, 46-ամյա Օլյա Առաքելյանը, 28-ամյա Սուրեն Աղուրյանը, 50-ամյա Վարսենիկ Գրիգորյանը և 32-ամյա Հովհանես Հովաննիսյանը։
Ոստիկաններն ու քննիչները պարզել են, որ նույն օրը, ժամը 08։40-ի սահմաններում Արմավիրի մարզի բնակիչ՝ 28-ամյա Կարեն Մանուկյանը, վարելով Ֆորդ-Տրանզիտ մակնիշի առանց համարանիշի ավտոմեքենան, Մեղրի համայնքի Նռնաձոր բնակավայրի մոտ դուրս է եկել ճանապարհի երթևեկելի գոտուց և գլորվել ձորակը, որի հետևանքով նշված անձինք մարմնական վնասվածքներով տեղափոխվել են հիվանդանոց:
Ֆոտոլրագրողը հայտնում է, որ 9 վիրավորով տեղի ունեցած խոշոր ճանապարհատրանսպորտային պատահարի մասին, չգիտես ինչու, Ճանապարհային ոստիկանության 2-րդ սպայական գումարտակի 6-րդ վաշտի ծառայողները՝ հրամանատար Վաչե Ալավերդյանի գլխավորությամբ չեն իմացել, այն դեպքում, երբ վաշտի հրամանատարը պետք է գոնե օպերատիվ ճանապարհներով իմանար վթարի մասին։
Եթե նախկին վաշտի հրամանատար Գեղամ Մարգարյանի պաշտոնավարման ժամանակահատվածում տարվա ցանկացած եղանակին, օրվա ցանկացած ժամի անգամ նյութական ճանապարհատրանսպորտային պատահար էր տեղի ունենում, ապա թե Գ. Մարգարյանը և եթե նույն վաշտի 1-ին դասակի հրամանատար Կարեն Օհանյանը տեղեկանում էին ու ՃՈ տեսուչների հետ ժամանում էին վթարի վայր, իսկ այժմ շատ դեպքերում վաշտի հրամանատար Վ. Ալավերդյանը իմանում է ժամեր, անգամ օրեր անց։
Կարելի է ասել՝ ներկայիս վաշտի հրամանատարին լավ կլինի հիշեցնել հայտնի՝ «Աշխարհ, կանգնիր, իջնող կա» խոսքը։
