A1News.am-Այսօր՝ սեպտեմբերի 19-ին, արտակարգ դեպք է տեղի ունեցել Երևանում։ Ժամը 21։50-ի սահմաններում Արտակարգ իրավիճակների նախարարության Փրկարար ծառայության 911 ճգնաժամային կառավարման կենտրոն ահազանգ է ստացվել, որ Բաշինջաղյան փողոցում ավտոմեքենա է այրվում։
Ինչպես հայտնում է ֆոտոլրագրող Գագիկ Շամշյանը, օպերատիվորեն ժամանել են ԱԻՆ ՓԾ Երևանի թիվ 7 հրշեջ-փրկարարական ջոկատից 1 մարտական հաշվարկ։
Օպերատիվորեն ժամանել են նաև ՀՀ ոստիկանության Պարեկային ծառայության Երևանի գնդի 3-րդ գումարտակի 2-րդ վաշտի պարեկները՝ գումարտակի հրամանատար Գոռ Առաքելյանի, վաշտի հրամանատար Գեղամ Եփրեմյանի գլխավորութմամբ։ Տեղում ուժեղացված ծառայություն են կատարել նույն վաշտի պարեկներ Արամ Բարսեղյանն ու Վոլոդյա Թադևոսյանը։
Պարզվել է, որ հրդեհ է բռնկվել Բաշինջաղյան փողոցի «Կարգին շինանյութի» մոտ գտնվող BMW մակնիշի ավտոմեքենայում: Մինչ հրշեջների ժամանումը, կրակը փորձել են հանգցնել վարորդն ու քաղաքացիները, սակայն այն դարձել է ոչ շահագործելի։ Հրդեհի արդյունքում մասամբ վնասվել է նաև Mercedes մակնիշի ավտոմեքանայի առջևի մի փոքր հատվածը։
Գ․ Շամշյանի տեղեկություններով՝ BMW-ն պատկանում է Երևանի բնակիչ 30-ամյա Հարություն Հ․-ին, իսկ Mercedes-ը Կոտայքի մարզի բնակիչ 49-ամյա Սամվել Ա.-ին։ Ըստ նախնական տեղեկությունների՝ բարեբախտաբար, տուժածներ չկան։ Լուսանկարները՝ Կարեն Գրիգորյանի
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով։
