A1News.am-Հայաստանի քննչական կոմիտեի Արմավիրի մարզային քննչական վարչության Վաղարշապատի քննչական բաժնում հարուցված քրեական վարույթի շրջանակում պարզվել է երեկ՝ հոկտեմբերի 17-ին, Արմավիրի մարզում տեղի ունեցած ողբերգական ավտովթարի հետևանքով մահացածների ինքնությունը։
Ինչպես հայտնում է ֆոտոլրագրող Գագիկ Շամշյանը, պարզվել է՝ Opel-ը վարել է Սևան քաղաքի բնակիչ՝ 62-ամյա Մանուկ Մելիքսեթյանը, իսկ Mercedes-ը վարել է Արմավիրի մարզի բնակիչ՝ 41-ամյա Էդգար Նազարյանը։
Վթարի հետևանքով Է. Նազարյանը մարմնական վնասվածքներով տեղափոխվել է Երևանի «Նաիրի» ԲԿ, իսկ Մ. Մելիքսեթյանը՝ «Վաղարշապատ» ԲԿ, որտեղ գիտակցության չգալով՝ մահացել է։ Գիտակցության չգալով մահացել է նաև «Արմավիր» ԲԿ տեղափոխված Opel-ի ուղևոր՝ Սևան քաղաքի բնակիչ, 30-ամյա Դավիթ Մելիքսեթյանը։ SHAMSHYAN.com-ի տեղեկությունները հավաստի էին, երբ հայտնել էինք, որ մահացածները հայր ու որդի են։
Ինչպես ավելի վաղ դեպքի վայրից հայտնել էր ֆոտոլրագրողը, հոկտեմբերի 17-ին խոշոր ու ողբերգական ավտովթար էր տեղի ունեցել Արմավիրի մարզում։ Ժամը 15։50-ի սահմաններում Երևան-Արմավիր ավտոճանապարհի 31 կմ հատվածում՝ Ակնալիճ գյուղի սկզբնամասում, բախվել էին Արմավիրի մարզի բնակիչ՝ 41-ամյա Էդգար Նազարյանի վարած Mercedes մակնիշի 77 DF 777 համարանիշի և Opel Astra մակնիշի ավտոմեքենաները։
Վթարի հետևանքով Opel-ի վարորդը մարմնական վնասվածքներով ծայրահեղ ծանր ախտորոշմամբ տեղափոխվել էր «Արմավիր» ԲԿ, իսկ ուղևորը՝ ծայրահեղ ծանր ախտորոշմամբ՝ «Վաղարշապատ» ԲԿ, Mercedes-ի վարորդն էլ տեղափոխվել էր Երևանի «Նաիրի» ԲԿ։
Մինչ դեպքի վայրում աշխատում էին քննիչները, «Վաղարշապատ» և «Արմավիր» ԲԿ-ներից ահազանգ էր ստացվել ոստիկանության Վաղարշապատի բաժին, որ իրենց մոտ տեղափոխված վիրավորները, գիտակցության չգալով, մահացել են։
