A1News.am-Տելեգրամյան ալիքներով երեկ տարածվեցին հայ ռազմագերիների գնդակահարության ահասարսուռ կադրերը: Արդյո՞ք բավարար են նյութերը միջազգային դատարաններ դիմելու համար: Թեմային հետևել է Արտյոմ Երկանյանը և «Հորիզոնի» տաղավարում մանրամասներ ներկայացրել:
«Հարավային Կովկասում ԵՄ ներկայացուցիչ Տոյվո Կլաարը շատ հստակ է արտահայտվել, որ եթե հաստատվի, որ այս տեսանյութը կեղծ չէ, ակնհայտ է, որ տեղի է ունեցել ռազմական հանցագործություն, որը պետք է հետաքննվի և մեղավորները համապատասխան ձևով պատժվեն: Մեղավոր ասելով, հավանաբար, նկատի ունի ոչ միայն այն կոնկրետ զինվորականներին, այլև հրաման տված բարձրաստիճան ղեկավարներին:
Այժմ արդեն որևէ կասկած չկա, որ տեսանյութը կեղծ չէ, դա հաստատել են փորձագետները, և անգամ պարզվել է, թե որտեղ ու երբ է տեղի ունեցել դեպքը. Իշխանասարի դիրքերից մեկում՝ «Հովազ» բարձունքի վրա գտնվող: Հայտնի է, հաստատվել է, որ տեղի ունեցածը եղել է սեպտեմբերի 13-ին, և պարզվել է նաև այդ զոհերից առնվազն երկուսի ինքնությունը, և այժմ արդեն ինչո՞ւ ադրբեջանցիներն այդ սպանված զինվորականների դիերը չեն վերադարձնում, հավանաբար, նպատակն այդ հանցանքը թաքցնելու փորձն է:
Այժմ արդեն կարող ենք խոսել անգամ այն մասին, որ գիտենք, թե ովքեր են կատարողները, քանի որ «Թաթոյան» հիմնադրամի փորձագետները, գնահատելով հանդերձանքը, պարզել են, որ շատ մեծ հավանականությամբ այդ ամենը կատարել են վերջերս Ադրբեջանի ՊՆ-ում ստեղծված նոր հատուկ ջոկատի ներկայացուցիչները: Ջոկատը կոչվում է «Կոմանդո» և հայտնի է, որ այդ ջոկատի ներկայացուցիչներին պատրաստել են թուրք հրահանգիչները:
Շատ բաներ կպարզվեն միջազգային հետաքննություն սկսելուց հետո միայն: Ակնհայտ է, որ Իշխանասարը զավթած այդ զինվորականները երկրի գլխավոր հրամանատարի հրամանն են կատարել, և տեղի ունեցածի համար պարտավոր են պատժվել, պիտի պատժվի ու պատասխանատվության ենթարկվի նաև նրանց հրաման տված բարձրաստիճան պաշտոնյան»,- ասաց Արտյոմ Երկանյանը:
Մՙանրամասները՝ ամբողջական հարցազրույցում:
