A1News.am-Մի քանի ամիս է՝ ինչ ադրբեջանցիները ճանապարհներ են բացում, էլեկտրասյուներ տեղադրում մեր օկուպացված տարածքներում։ Երեկ կոնֆլիկտ առաջացավ այն պատճառով, որ ադրբեջանցիները փորձում էին խախտել պայմանավորվածությունը, ըստ որի՝ ճանապարհի վրա ու գյուղի մեջ ոչ մի դեպքում չպետք է տեղադրվեին էլեկտրասյուներ։ Թույլ չենք տվել, հարցը լուծվել է, ոչ մի խնդիր հիմա չկա։ Այդ մասին քիչ առաջ «Փաստինֆո»-ի հետ զրույցում ասաց Աղավնոյի գյուղապետ Անդրանիկ Չաուշյանը։
«Նորություն չէ, որ ադրբեջանցիները ճանապարհներ էլ են սարքում, սյուներ էլ են տնկում, ու հենց մի բան ասում ես՝ նոյեմբերի 9-ի տխրահռչակ փաստաթուղթն են աչքդ խոթում։ Ասում են՝ երկրիդ ղեկավարն է ստորագրել ու համաձայնություն տվել, դու ո՞վ ես, որ արգելես։ Դեռ լավ է՝ կարողացել ենք հասնել նրան, որ համաձայնել են սարերով, անտառներով ճանապարհ գցել, որպեսզի կոնֆլիկտներ գյուղացիների հետ չառաջանան»,-ասաց գյուղապետը։
Ըստ Չաուշյանի՝ Արցախի օկուպացված տարածքներում կառուցված հաղորդակցության միջոցներից ռուսներն էլ են օգտվում ու նաև՝ որքան էլ տեղացիները չցանկանան թուրք տեսնել, գործնականում անհնար է դա, քանի դեռ օկուպացիայի մեջ գտնվող հայկական հողերը չենք ազատագրել։
Չաուշյանը տարբեր քաղաքական ուժերի խորհուրդ տվեց չշահարկել Աղավնոն ու արհեստական կոնֆլիկտներ չստեղծել՝ նամանավանդ, եթե այնտեղ չեն ապրում։ Հիշեցնենք, որ որոշ լրատվամիջոցներ ԱԺԲ-ի ներկայացուցիչների խոսքն էին մեջբերել՝ նշելով, թե Աղավնոյում ադրբեջանցիներն էլեկտրասյուներ են փորձում տեղադրել՝ խաղաղապահների լուռ համաձայնությամբ, ինչը փաստորեն, չի համապատասխանում իրականությանը։
