A1News.am-Lragir.am-ը գրում է. Մոսկվայում տեղի է ունեցել եռակողմ աշխատանքային խմբի հերթական հանդիպումը՝ Ռուսաստանի, Բաքվի և Հայաստանի փոխվարչապետների համանախագահությամբ։ Հանդիպման արդյունքների մասին տեղեկատվություն է տարածել Ռուսաստանի կառավարությունը։
«Կողմերը քննարկել և ի մի են բերել իրենց դիրքորոշումները սահմանային, մաքսային և այլ տեսակի հսկողության, ինչպես նաև ճանապարհներով և երկաթուղիներով քաղաքացիների, տրանսպորտային միջոցների և բեռների անվտանգ անցման հարցերի շուրջ՝ Ադրբեջանի Հանրապետության և Հայաստանի Հանրապետության տարածքներով», ասվում է հաղորդագրության մեջ։
Այս պարբերության առաջին մասում ասվում է, որ նոր հաղորդակցությունները կունենան սահմանային, մաքսային և այլ տեսակի հսկողության կետեր։ Մայիսի 24-ին Բրյուսելում կայացած եռակողմ հանդիպումից հետո Ալիևն ասել էր, որ «Զանգեզուրի միջանցքը» համաձայնեցված է։ Հայկական կողմն առարկել էր՝ նշելով, որ «միջանցքային տրամաբանությունը բացառվում է»։ Այնուհետեւ Եվրախորհրդի ղեկավար Շառլ Միշելի խոսնակը հատուկ հայտարարություն էր տարածել, որտեղ ասվում էր, որ խոսքը «արտատարածքային հաղորդակցությունների» մասին չէ։
Մաքսային և այլ վերահսկողությունը տպավորություն է թողնում, որ սա այնքան էլ միջանցք չէ։ Միեւնույն ժամանակ, համաձայն 2020 թվականի նոյեմբերի 9-ի եռակողմ հայտարարության՝ «Հայաստանի Հանրապետությունը երաշխավորում է Ադրբեջանի Հանրապետության արևմտյան շրջանների և Նախիջևանի Ինքնավար Հանրապետության միջև տրանսպորտային կապի անվտանգությունը՝ քաղաքացիների, տրանսպորտային միջոցների և ապրանքների անխոչընդոտ տեղաշարժը կազմակերպելու նպատակով։ Տրանսպորտային կապերի վերահսկողությունն իրականացնում է Ռուսաստանի Անվտանգության դաշնային ծառայության սահմանապահ ծառայությունը։
Հայաստանը չի հրաժարվել եռակողմ հայտարարությունից, այսինքն չի բացառում ՌԴ ԱԴԾ-ի վերահսկողությամբ «ինքնիշխան» միջանցքը։ Եթե ճանապարհի հսկողությունն իրականացվում է այլ երկրի կողմից, դա ինքնին արտատարածքային ճանապարհ է, ինչ ձեւակերպում էլ ունենա։ Ի դեպ, այլ հաղորդակցությունների պարագայում չի նշվում ՌԴ ԱԴԾ-ի վերահսկողության մասին։
Բրյուսելի հանդիպումից հետո Շառլ Միշելի հայտարարության մեջ հղում չկար եռակողմ հայտարարությանը, ինչը նյարդայնացրել է Մոսկվային։ Մոսկվան վճռական է բացել «արտատարածքային հաղորդակցությունը» ԱԴԾ վերահսկողության ներքո։ Դիվանագիտական ճնշման, թե ուժային ճանապարհով։
