A1News.am-Այսօր՝ հունվարի 20-ին, ողբերգական դեպք է տեղի ունեցել Տավուշի մարզում։ Ժամը 14։10-ի սահմաններում Հ ներքին գործերի նախարարության Փրկարար ծառայության 911 ճգնաժամային կառավարման կենտրոն ահազանգ է ստացվել, որ Բերդ քաղաքի Մաշտոցի փողոցի թիվ 15 հասցեի մոտ խողովակաշար անցկացնելու համար հողային փորման աշխատանքներ կատարելու ժամանակ փոսում տեղի է ունեցել հողաշերտի փլվածք, և աշխատակիցը մնացել է հողաշերտի տակ։
Հրշեջ փրկարարները քաղաքացուն հողաշերտի տակից դուրս են բերել և մոտեցրել օպերատիվորեն ժամանած «Բերդ» ԲԿ-ի շտապօգնության ավտոմեքենային։
Բժիշկները վիրավորին մինչև հիվանդանոց տեղափոխելը, տեղում առաջին բուժօգնություն են ցուցաբերել, սակայն նրա վիճակը եղել է ծայրահեղ ծանր։
Մինչ տեղում աշխատում էին ոստիկաններն ու փրկարարները, Բերդի բժշկական կենտրոնից Ոստիկանության Տավուշի բաժին ահազանգ է ստացվել, որ տեղափոխված քաղաքացին, գիտակցության չգալով, մահացել է։
Գ. Շամշյանի տեղեկություններով՝ մահացածն աշխատում էր «Վեոլիա Ջուր» ընկերությունում և իր գործընկերների հետ ջրագիծ էին անցկացնում։
Տեղում ոստիկանության Տավուշի բաժնի ծառայողները ոստիկանության մարզային վարչության պետ Սերգո Ավետիսյանի և Ոստիկանության Տավուշի բաժնի պետ Ա. Լոբյանի հետ պարզել են, որ մահացածը Բերդ քաղաքի բնակիչ՝ 63-ամյա Վալերիկ Հ-ն է։
