A1News.am-«Լուրերի» իրականացրած ուսումնասիրությունների արդյունքում ստացվել են 2022 թ. դեկտեմբերի 12-ին Լաչինի միջանցքը փակած որոշ ադրբեջանցիների պարզաբանված տվյալները, ինչպես նաև Ադրբեջանում գործող ոչ կառավարական ՀԿ-ների ցուցակը, որոնք այս կամ այն կերպ առնչվում են նշված ճանապարհի փակման գործընթացին: Այս մասին գրում է Հանրային հեռուստաընկեության լրատվական կայքը։
Ստացված տվյալների համաձայն, միջանցքի փակման ակցիան համակարգում է Ադրբեջանի հասարակական կազմակերպությունների պետական աջակցության գործակալությունը, որի գործունեությունն իր հերթին համակարգում է Ադրբեջանի Վերահսկող խորհուրդը, որը բաղկացած է 11 անդամից, որոնց նշանակում է Ադրբեջանի նախագահը: Միևնույն ժամանակ Վերահսկող խորհրդի 8 անդամ նշանակվում են հասարակական կազմակերպությունների ներկայացուցիչներից, իսկ 3-ը` պետական պաշտոններ զբաղեցնող անձանց թվից:
Նշված ակցիայի լուսաբանման և տարածման գործընթացը համակարգում են Ադրբեջանի մեդիայի զարգացման գործակալությունն ու Ադրբեջանի մամուլի խորհուրդը, իսկ կամավորների աշխատանքը համակարգում է Ադրբեջանի կամավորական կազմակերպությունների միությունը:
Ակցիային առնչվող ոչ պետական կազմակերպությունների ցուցակը պայմանականորեն բաշխված է 6 խմբի, որպես կազմակերպություններ ներառված են 139 ՀԿ-ների, երիտասարդական 43 նախաձեռնության, 13 կամավորի (волонтер), հանրային խորհրդի 9 կազմակերպության, 4 կուսակցության՝ այդ թվում նաև իշխող «Նոր Ադրբեջան»-ը, և պետական մեկ հաստատության՝ կրոնական հաստատությունների հետ աշխատող պետական կոմիտեի անվանումները:
Ուսումնասիրվել են նաև վերոնշյալ ակցիայի մասնակիցների վերաբերյալ տեղեկությունները: Մասնավորապես, նշված են 507 «ակտիվիստ»-ների անուն-ազգանուններ, նրանց պաշտոնը, առնչությունը պետական-հասարակական կառույցներին, ինչպես նաև նրանց երկու կամ երեք անձնական լուսանկարներ: Մասնակիցների գերակշիռ մասը լրագրողներ և հասարակական կազմակերպությունների անդամներ են, որոնց թվում են Բաքվի պետական համալսարանի դասախոսներ և ուսանողներ:
Վերջիններիս լուսանկարները վերցված են համացանցից (հիմնականում Facebook-ից), որոնց մի մասը կատարված է ակցիայի ժամանակ: