A1News.am-Երեկ, փետրվարի 10-ի երեկոյան, որ դեռ արարատցի Գեղամը Hummer H3-ով թմրանյութի ազդեցության տակ չէր մագլցել կառավարության դիմացի մայթերն ու ջարդուփշուր արել պարեկների Skoda-ները, Սևանի փողոցում ևս մեկ արտակարգ դեպք է տեղի ունեցել: Ու դարձյալ` թմրանյութի ազդեցության հետևանքով:
Երեկ մամուլում տեղեկություն տարածվեց, թե փետրվարի 10-ին, ժամը 18:20-ի սահմաններում Երևանի Սևանի փողոցում գտնվող «Պլատինիում» առևտրի կենտրոնի դիմաց մի տղամարդ Range Rover մակնիշի մեքենայից կրակոցներ է արձակել տվյալ առևտրի կենտրոնի տնօրենի վրա և դիմել փախուստի:
Մեզ այս դեպքից որոշակի մանրամասներ են հայտնի դարձել: Մենք տեղեկացանք, որ մամուլում նշված 32-ամյա Հովհաննես Գ.-ն, որը կրակոցներ արձակողն է, Երևանի բնակիչ Հովհաննես Գևորգյանն է, որը թմրանյութի ազդեցության տակ է եղել, և, գտնվելով ոչ ադեկվատ վիճակում, իր վարած Range Rover Sport մակնիշի մեքենայից կրակոցներ է արձակել «Պլատինիում»-ի տիրոջ` 38-ամյա Ռոբերտ Մելիքյանին պատկանող Toyota Camry ավտոմեքենայի վրա:
Ութ պարկուճ է հայտնաբերվել տարածքում: Կրակոցների պահին Ռոբերտ Մելիքյանը մեքենայում է եղել, և փամփուշտներից մեկը դիպել է նրա ոտքին` վնասելով ծունկը: Դրանից հետո Մելիքյանը տեղափոխվել է «Էրեբունի» բժշկական կենտրոն: Մելիքյանի կյանքին, բարեբախտաբար, վտանգ չի սպառնում:
Ուշագրավն այն է, որ կրակոցներ արձակած Հովհաննես Գևորգյանն ու կրակոցներից տուժած Ռոբերտ Մելիքյանը զարմիկներ են. Գևորգյանը Մելիքյանի քեռու տղան է: Այսինքն` Հովհաննես Գևորգյանն իր հարազատ հորաքրոջ որդու վրա է կրակել` նպատակ ունենալով սպանել իր հարազատին: Կրակոցներից հետո նա իր Range Rover-ով դիմել է փախուստի: Ոստիկանները մինչ այս պահը դեռ չեն հայտնաբերել Գևորգյանին:
Մեզ պատմեցին, որ 32-ամյա Հովհաննես Գևորգյանը վաղուց է թմրամիջոցների ազդեցության տակ, նաև դրանց առքուվաճառքով է զբաղվում, այսպես ասած` «բառիգ» է, ու ծնողները, հարազատները, նրա ամբողջ շրջապատը ուղղակի կրակն է ընկել վերջինիս ձեռքը: Նա անգամ ծնողների դեմ է ոտնձգություններ կատարել, մի որոշ ժամանակով նրան նաև հարկադիր բուժման են ուղարկել, բայց ապարդյուն: Թմրամիջոցներից նրա ունեցած կախվածության հետևանքը եղավ այն, որ նա երեկ կրակեց իր զարմիկի վրա: Ու եթե ոստիկանությունը ժամ առաջ չհայտնաբերի նրան, դժվար է ասել` էլ ինչ փորձանքներ կարող է բերել Հովհաննես Գևորգյանը մարդկանց գլխին:
