A1News.am-SHAMSHYAN.com-ի տեղեկություններով՝ մայիսի 31-ին Հայաստանի քննչական կոմիտեի Արմավիրի մարզային քննչական վարչության Վաղարշապատի քննչական բաժնում նախկին ՀՀ քր.օր-ի 104 հոդվածի 1-ին մասի (սպանություն) հատկանիշներով հարուցվել էր քրեական գործ։
Ինչպես հայտնում է ֆոտոլրագրող Գագիկ Շամշյանը, նշված քրգործը հարուցվել էր Էջմիածին քաղաքից դեպի «Արմավիր» քրեակատարողական հիմնարկ տանող ճանապարհին՝ ժողովրդին հայտնի «Չոբան Քյարա» կոչվող խաչմերուկի հարևանությամբ հայտնաբերված տղամարդու դիակի փաստով։
Ոստիկանության Վաղարշապատի բաժնի ծառայողները՝ բաժնի պետ Արթուր Բդոյանի, բաժնի պետի օպերատիվ գծով տեղակալ Արթուր Ֆիշյանի գլխավորությամբ պարզել էին մահացածի ինքնությունը, ով Արմավիրի մարզի բնակիչ՝ 58-ամյա Մեխակ Թ-ն էր։
Առեղծվածային այս դեպքը բացահայտելու համար ոստիկանության Արմավիրի մարզային վարչության պետ Կարեն Հակոբյանի որոշմամբ ստեղծվում են օպերատիվ խմբեր՝ մեկը՝ իր, երկուսը՝ Ա. Բդոյանի և Ա. Ֆիշյանի գլխավորությամբ։ Վաղարշապատի ոստիկանները օրերի ընթացքում կատարում են հսկայածավալ օպերատիվ-հետախուզական միջոցառումներ և պարզում իրականությունը. պարզվել է, որ մայիսի 31-ին, ժամը 01։30-ի սահմաններում Մեխակ Թ-ին իր կողմից վարած Ford մակնիշի ավտոմեքենայով վրաերթի է ենթարկել Արմավիրի մարզի բնակիչ՝ 28-ամյա Մանվել Բ-ն, ով վիրավորին թողնելով անօգնական՝ դեպքի վայրից հեռացել է։
Վաղարշապատի ոստիկաններին մնում էր՝ հայտնաբերեին Մանվել Բ-ին և ավտոմեքենան, ինչը հաջողվում է նրանց ու նշված ավտոմեքենայով հանդերձ՝ Վաղարշապատի ոստիկանությունից ներկայացնում են Վաղարշապատի քննչական բաժին, որտեղ դեպքի փաստով հարուցվում է քրեական գործ՝ ՀՀ քր.օր-ի 342 հոդվածի 2-րդ մասի հատկանիշներով։ Սպանության փաստը հերքվում է՝ շնորհիվ նաև ոստիկանների կողմից հայտնաբերված տեսախցիկի կողմից արձանագրված տեսանյութի։
Ավելի վաղ հայտնել էինք, որ մայիսի 31-ին առեղծվածային դեպք էր տեղի ունեցել Արմավիրի մարզում: Ժամը 13:50-ի սահմաններում ոստիկանության Վաղարշապատի բաժին ահազանգ էր ստացվել, որ «Արմավիր» քրեակատարողական հիմնարկի մոտ տղամարդու դի կա:
Ինչպես հայտնել էր ֆոտոլրագրողը, դեպքի վայր էին ժամանել ոստիկանության Արմավիրի մարզային վարչության պետ Կարեն Խաչատրյանը, ոստիկանության Վաղաշապատի բաժնի պետ Արթուր Բդոյանն ու նույն բաժնի պետի օպերատիվ գծով տեղակալ Արթուր Ֆիշյանը:
Ահազանգով ժամանել էր նաև Հայաստանի քննչական կոմիտեի Արմավիրի մարզային քննչական վարչության պետ Սամվել Տոնոյանը, նույն վարչության Վաղարշապատի քննչական բաժնի պետն ու ավագ քննիչ Վարդանյանը:
Ոստիկաններն ու քննիչները Էջմիածին քաղաքից դեպի «Արմավիր» քրեակատարողական հիմնարկ տանող ճանապարհին՝ ժողովրդին հայտնի «Չոբան-Քյարա» կոչվող խաչմերուկի բետոնե կանգառի մոտ, հայտնաբերել էին տղամարդու դի: Ոստիկաններն ու քննիչները պարզել էին, որ մահացածը Արմավիրի մարզի բնակիչ, 58-ամյա Մեխակ Թամոյանն էր:
Դատաբժշկի նախնական եզրակացության համաձայն՝ մահացածի մարմնի տարբեր հատվածներում առկա էին մարմնական վնասվածքներ:
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
