A1News.am-Ընդդիմադիրները վաղը շենքեր չեն շրջափակի, բայց անելիքներ կլինեն։ Այս մասին Ֆրանսիայի հրապարակում այսօրվա ամփոփիչ հանրահավաքում հայտարարեց «Դիմադրություն» շարժման անդամ, ԱԺ փոխխոսնակ Իշխան Սաղաթելյանը։
«Վաղը 09։30 հավաքվում ենք Ֆրանսիայի հրապարակում, կլինեն ակցիաներ, բայց չենք շրջափակելու շենքեր։ Եկեք միացեք, 10։30 եկեք, եթե ավելի շուտ հարմար չէ։ Լիքը աշխատանքներ կան անելու» , -ասաց նա` նշելով, որ վաղը ժամը 19։00-ին կլինի հերթական հանրահավաքը։ Սաղաթելյանը շեշտեց, որ վաղը կարևոր վճռական օր է լինելու։
Անդրադառնալով մայիսի 22-ին ՀՀ վարչապետ Նիկոլ Փաշինյանի՝ Բրյուսել կատարելիք այցին և կայանալիք բանակցություններին` նա ասաց. «Մենք հստակ ասել ենք և արձանագրել, որ Նիկոլը չունի մանդատ՝ ժողովրդի, Հայաստանի Հանրապետության կողմից որևէ բանակցություն վարելու: Դիմում եմ այն անձանց, ում հետ ինքը հանդիպելու է՝ շատ հստակ ասելով, որ Հայաստանի Հանրապետության կողմից ներկայացված այդ 6 առաջարկները հայ ժողովրդի կամքի, շահերի հետ որևէ կապ չունեն։
Հետևաբար, Նիկոլի հետ ձեռք բերված ցանկացած պայմանավորվածություն ոչ լեգիտիմ է և առ ոչինչ»,- ասաց Իշխան Սաղաթելյանը։
Նա տեղեկացրեց նաև՝ նշված այցին և պայքարի դուրս եկած քաղաքացիների և քաղաքական ուժերի տեսակետներին շատ ավելի հանգամանալից անդրադարձ է լինելու մայիսի 21-ին սպասվող հանրահավաքին։
