A1News.am-Հարգելի լրատվամիջոցներ,
Ես՝ Արման Վահանի Սիմոնյանս, 29.09.2020թ.-25.10.2020թ. որպես կամավոր գտնվել եմ ՊԲ N զորամասում ընթացող, պաշտպանության մարտական գործողությունների մասնակիցների կազմում, որից հետո մասնակցել եմ նաեւ Սղնախ - Քարին տակ – Շուշիի մարտերին։ 05.11.2020թ.-ին ստացել եմ բեկորային վիրավորում։ Ներկա դրությամբ նույնպես իրականացնում եմ մարտական հերթապահություն մեր հայրենիքի ամենավտանգավոր հատվածներում։
2021թ. դեկտեմբերի 2-ին կայքում հրապարակվել է «Հայ «զինվորները» կապկպել եւ տանջում են անօգնական մկան» վերտառությամբ հոդված (Տես https://econews.am/?p=12064&l=am )։ Լրագրողական նյութում իմ լուսանկարներն են, ինչպես նաեւ տեսանյութ, որտեղ երեւում է, որ ինքնաձիգներից կապված է կենդանի մուկ, իսկ մեկ անձ հարվածներ է հասցնում կենդանուն։ Հոդվածի հեղինակը նշել է «Տեսանյութի ամբողջ ընթացքում տղամարդիկ հռհռում են տեղի ունեցողի վրա, իսկ Արման Սիմոնյանը շարունակում է տանջել եւ հայհոյել կենդանուն» եւ «Տեսանյութը լայն տարածում է ստացել հարյուրավոր այլ «հայ վրիժառուների» շրջանում»։ Հոդվածագիրը նաեւ ներկայացրել է հոգեբանների կարծիքները, որոնք մասնավորապես հայտնել են «... այն մարդիկ, որոնք առհասարակ տանջում են կենդանիներին, նորմալ չեն ... «Ցանկացած դաժան վերաբերմունք, արդեն նշանակում է հոգեբանական լուրջ խնդիրներ, եթե ոչ՝ հոգեբուժական...»»: Հիշյալ հոդվածը եւ տեսանյութը համացանցում ունեցել են մեկ միլիոնից ավելի դիտումներ։
Տարածելով իմ լուսանկարները եւ ինձ ներկայացնելով որպես կենդանիների նկատմամբ բռնություն գործող անձ՝ դրանից բխող հետեւանքներով, արատավորել են իմ անունը եւ հեղինակությունը, քանի որ տեսանյութի հետ ես ընդհանրապես որեւէ կապ չունեմ, չգիտեմ թե որտեղ է այն արվել, երբ եւ ում կողմից։ Պարզապես հարյուրավոր անձանց նման, այդ տեսանյութը եղել է իմ էջում, սակայն չգիտես թե ինչու հենց ես եմ թիրախավորվել եւ ինձ են ներկայացրել որպես բռնարար, այնինչ, ինչպես արդեն նշել եմ, տեսանյութի հետ ես որեւէ կապ չունեմ։
Վերջերս դիմել եմ հիշյալ կայքին խնդրելով հերքեն այն տեղեկությունը, որ կենդանուն տանջող անձնավորությունը հանդիսացել եմ ես, խնդրել եմ նշել, որ դա եղել է վրիպակ կամ սխալմունք, այդպիսով գոնե ինչ-որ կերպ կհարթեն իմ անվանը եւ հեղինակությանը հասցված վնասը։ Սակայն որեւէ պատասխան կամ հերքում մինչեւ օրս չի եղել։
Վերոգրյալի հիման վրա խնդրում եմ հրապարակեք իմ այս դիմումը, որպեսզի հասարակությունն իմանա, որ ես որեւէ կապ չունեմ հիշյալ տեսանյութի հետ եւ իմ հասցեին հնչեցված մեղադրանքներն անհիմն են։
Ինչպես արդեն նշեցի իրականացնում եմ մարտական հերթապահություն մեր հայրենիքի ամենավտանգավոր հատվածներում, յուրաքանչյուր օր եւ ժամ անցնում է լարված պայմաններում։ Այդ ամենով հանդերձ հիշյալ տեսանյութն ամեն օր հավաքում է ավելի շատ դիտումներ եւ լրացուցիչ անգամ ունենում եմ անհիմն լարվածություն։
Ակնկալում եմ, որ գոնե մի քանի լրատվամիջոց կհրապարակեն իմ դիմումը, որով ինչ-որ կերպ կհարթվի իմ անվանը եւ հեղինակությանը հասցված վնասը։
Հարգանքով՝ Արման Սիմոնյան
