A1News.am-NEWS.am-ի խմբագրություն ահազանգած քաղաքացին նշել է, որ իր հինգ տարեկան դուստրը մահացել է «Ուիգմոր» Բժշկական կենտրոնի բժիշկների թույլ տված սխալի հետեւանքով: Երեխայի մայրը՝ Նունե Համբարձումյանը, NEWS.am-ի հետ զրույցում պատմել է, որ իր դստեր մոտ երեք տարեկանում ախտորոշվել է դաունի սինդրոմ:
Երեխան վիրահատվել է, քանի որ նրա մոտ ունեցել է երկրորդ ողի ատամիկի կոտրվածք:
«Ինձ ասացին՝ վիճակը վատ է, պետք է վիրահատենք: Բայց վիրահատությունը դրսում են կատարում, քանի որ մեր բժիշկները դրան պատրաստ չեն: Ինձ խորհուրդ տվեցին գնալ Արա Անթառանյանի մոտ, որն աշխատում է այդ կենտրոնում: Ես գնացի իր մոտ, ինքն ասաց, որ Շվեցարիայից բժիշկ է գալու կլինիկա: Բժիշկը ժամանեց, նայեց թղթերը եւ ասաց, որ չափից լուրջ վիրահատություն է լինելու: Վիրահատության ընթացքում հնարավոր է լինի շնչառության վատթարացնում, սրտի կանգ, ընդհուպ՝ մահ»,- պատմել է նա:
Տիկնոջ խոսքով՝ ինքն այդ ռիսկային վիրահատությանը չի համաձայնվել, սակայն վեց ամիս անց, երբ դստեր վիճակն ավելի է վատացել, ինքը բժիշկ Անթառանյանին տվել է իր համաձայնությունը եւ վիրահատությունը կատարվել է ապրիլի 20-ին:
«Վիրահատությունը բարեհաջող տեղի ունեցավ: Առաջին երկու օրերին երեխան լավ էր, այնքան լավ, որ մտածեցի, եթե այսպես գնաց, մեզ շուտ դուրս կգրեն: Երրորդ օրը երեխայի վիճակը վատացավ: Երբ երեխային իջեցրին պալատ, երեխան խորխ ուներ: Ասում էին՝ ոչինչ: Իմ երեխային կիսամեռ վիճակով, երկկողմանի թոքաբորբով տեղափոխել են «Սուրբ Աստվածամայր» ԲԿ, որտեղ կարողացել են ուշքի բերել: Այնտեղ արվել է ամեն ինչ, բայց երեխայիս կյանքը փրկել չի հաջողվել: «Ուիգմոր»-ից առ այսօր ինձ չեն կարողանում պատասխանել, թե ինչու է նման բան եղել, որովհետեւ չգիտեն: Ես ասում եմ՝ պարոն Անթառանյան, ինչո՞ւ է իմ երեխան մահացել այն դեպքում, երբ մահը կապ չի ունեցել վիրահատության հետ, ինքը չգիտի»,- ասել է Նունե Համբարձումյանը:
NEWS.am-ը կապ է հաստատել նաեւ Բժշկական կենտրոնի հետ, որտեղից էլ ասել են, որ դատաբժշկական փորձաքննությունն ապացուցում է, որ երեխային վիրահատության ընթացքում որեւէ վնաս չի պատճառվել, իսկ թոքաբորբն իրենց կենտրոնում չի առաջացել:
«Երեխայի վիրահատությունն անցել է բարեհաջող: Ծնողին 1.5 տարի բացատրվել է վիրահատություն անելու եւ չանելու բոլոր ռիսկերը: Երեխան մահացել է այլ հիվանդանոցում, ինչի պատճառով դժվար է ասել, թե ինչից է գրանցվել մահը: Ի սկզբանե, երեխան առողջ չի եղել: Մենք Նունեին մի քանի անգամ բացատրել ենք, որ պետք է տեղի ունենա խորհրդակցություն մեր եւ բժիշկների միջեւ, որովհետեւ երեխան լավ էր, պետք է էքստուբացիա արվեր, բայց երեխայի վիճակը վատացավ, եւ քանի որ մեր կենտրոնը վերակենդանացման բաժին չունի, երեխան տեղափոխվել է այլ ԲԿ: Հնարավոր է՝ երեխան երկրորդային վարակ է վերցրել, հնարավոր է, որ այլ բարդություններ են տեղի ունեցել: Երեխան ի սկզբանե ունեցել է բազմաթիվ առողջական խնդիրներ եւ այն թոքաբորբը, որ զարգացել է, ասպիրացիայի հետեւանքով է զարգացել: Բոլոր փաստերը կան, որ երեխան մեզ մոտից տեղափոխվել է առանց թոքաբորբի, բայց հետո մահվան պատճառը նշվել է թոքաբորբը»,- պարզաբանել են կենտրոնից:
Աղբյուր՝ NEWS.am
