A1News.am-Գյումրեցի Մարինե Նուրոյանի ընտանիքը հրաշքով է փրկվել 88-ի երկրաշարժին։ 34 տարի է անցել այդ մղջավանջային օրերից, բայց 64-ամյա տիկին Մարինեն ամեն ինչ մանրամասն հիշում է ու պատմում, թե ինչպես փրկվեցին ինքն ու մանկահասակ դուստրերը։ 1988-ին նա 30 տարեկան էր։ Տիկին Մարինեի հետ հանդիպումը կազմակերպել էր Գյումրիի «Վառեմ-մարեմ արվեստանոց»-ը։
«Մեզ երկրորդ օրը հանեցին փլատակներից։ Ես լսում էի պապայիս լացի ձայնը, գոռում էի, բայց ինձ չէին լսում։ Էրեխեքս շոր չունեին հագնելու, մամայենցս տանն էլ պստիկ էրեխա չկար, շոր չկար, մենք փլատակների տակից ելել էինք, պստիկս էրկու տարեկան չկար, գիրկս էր, որոշեցինք գնալ հրապարակ, էնտեղ շոր էին բաժանում։ Հենց հարևանը տեսավ՝ աչքի լույս տվեց պապայիս, ասաց՝ էրեխեքդ սաղ են մնացել»,- հուզմունքով վերհիշում է տիկին Մարինեն։
Եվ երեք երեխաների հետ հրապարակ գնալու ճանապարհին էլ տեսել է փողոցներով անցնող լուսանկարիչների․․․ Պատահական արված լուսանկարն էլ՝ երեք երեխաներ հետ, դառնում է ճակատագրական։ Այն հայտնի դարձավ ամբողջ աշխարհին։
«Նկարել է Մխիթարը, իր հետ շատ ենք հանդիպել, «Արմենպրես»-ի թղթակիցն է։ Միամիտ նկարեց, ո՞վ գիտեր, թե ինչ պիտի լիներ»,- ասում է տիկին Մարինեն։
Փլատակներից փրկված Մարինե Նուրոյանի և նրա երեք երեխաների լուսանկարը հայտնվեց միջազգային հեղինակավոր թերթերի առաջին էջերին և դարձավ 88-ի երկրաշարժի խորհրդանիշը։ Լուսանկարը միանգամից գերեց արտասահմանցիների ուշադրությունը։ Պատահական լուսանկարի հետքերով Ավստրիայից են եկել, ինչը ընտանիքի համար դարձավ ճակատագրական։
«Մեզ գտան ավստրիացիները լուսանկարի հետքերով, գնացել էին Սլաբոդկա թաղամաս, տատիս վերցրել էին, եկել մեր տուն։ Ասացին, որ ուզում են տուն տան ավստրիական գյուղում։ Ես վախենում էի, թե էս ինչ է, ովքեր են, ինչ են ուզում։ Մեզ տարան էդ թաղամաս, ցույց տվեցին ու ասացին, որ էստեղ մեզ տուն են տալու, ես նոր էդ ժամանակ հավատացի․․․Ընձի ստեղ դոմիկ չէին տա, իսկ ավստրիացիները տուն տվեցին»,- ասում է կինը:
Մինչ օրս տիկին Մարինեն ու իր ընտանիքն ապրում են Գյումրիի Ավստրիական թաղամասում։ Երկրաշարժից առաջ ապրել են Գերցեն թաղամասի 9 հարկանի շենքի 5-րդ հարկում։
2008-ին՝ երկրաշարժի 20-րդ տարելիցի կապակցությամբ, ևս մեկ լուսանկար հայտնվեց, որտեղ այս անգամ տիկին Մարինեն թոռների հետ է։ 20 տարի անց նորից նույն լուսանկարիչն է նկարել։
64-ամյա Մարինե Նուրոյանը երեք դուստր և մեկ որդի ունի, որդին ծնվել է 1995-ին։ Յոթ թոռ ունի։ Թոռնուհին՝ 15-ամյա Սյուզին, ով «Վառեմ-մարեմ» արվեստանոցի սան է, ինքն է խնդրել, որ տատը հանդիպի արվեստանոցի սաների հետ և պատմի հրաշքով փրկված իր ընտանիքի պատմությունը։
