A1News.am-Այսօր՝ հոկտեմբերի 24-ին, արտակարգ դեպք է տեղի ունեցել Երևանում: Ժամը 11:30-ի սահմաններում Արտակարգ իրավիճակների նախարարության փրկարար ծառայության 911 ճգնաժամային կառավարման կենտրոն ահազանգ է ստացվել, որ Նուբարաշենի «Հոգեկան առողջության պահպանման ազգային կենտրոնի» շինություններից մեկում հրդեհ է բռնկվել:
Ինչպես հայտնում է ֆոտոլրագրող Գագիկ Շամշյանը, օպերատիվորեն ժամանել է ԱԻՆ ՓԾ Երևան քաղաքի փրկարարական վարչության հրշեջ-փրկարարական ջոկատից 4 մարտական հաշվարկ: Ժամանել է նաև հատուկ փրկարարական աշխատանքներ կատարող խումբն ու ճգնաժամային կառավարման ազգային կենտրոնի օպերատիվ խումբը:
Հրշեջները մարել են հիվանդանոցի վարչական շենքերից մեկի նկուղում և առաջին հարկում առաջացած կրակը, իսկ մինչ այդ էլ հիվանդանոցի բուժանձնակազմի և ոստիկանության պարեկային ծառայության Երևանի գնդի պարեկների հետ տարհանել են մոտ 60 քաղաքացու: Հրշեջները այնուհետև նախ կանխել են կրակի տարածումը, ապա մարել այն:
Ըստ նախնական տեղեկությունների՝ հրդեհի հետևանքով, բարեբախտաբար, տուժածներ չկան:
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով' դատարանի' օրինական ուժի մեջ մտած դատավճռով:
