A1News.am-«Ազատ քաղաքացի» քաղաքացիական նախաձեռնությունների աջակցման կենտրոնի ղեկավար Հովսեփ Խուրշուդյանը ֆեյսբուքյան իր էջում գրել է. «Պուտինը շատ հեռատեսորեն հրաժարվում է քննարկել Զելենսկու հետ Դոնբասի հարցը՝ ասելով, որ Ռուսաստանը այդ կոնֆլիկտի կողմը չէ և որ Ուկրաինան պետք է լուծի Դոնբաս-Լուգանսկի խնդիրը այդ չճանաչված հանրապետությունների առաջնորդների հետ ուղիղ բանակցությունների միջոցով։
Հայաստանը Լևոն Տեր-Պետրոսյանի օրոք մոտավորապես նույն դիրքն էր բռնել, որի շնորհիվ անգամ ՄԱԿ-ի անվտանգության խորհուրդը իր բանաձևերում երբեք չի մեղադրել Հայաստանին Արցախի կողմից իր շուրջ շրջանների ազատագրման համար, այլ միայն հորդորել է Հայաստանին օգտագործել իր ազդեցությունը Արցախի առաջնորդների և «հայկական ուժերի» վրա՝ ռազմական գործողությունները դադարեցնելու համար։
Ամեն բան փոխվեց, երբ Հայաստանում իշխանությունը բռնազավթեց Պուտինի «ընկեր» Ռոբերտ Քոչարյանը, ով Արցախին դուրս մղեց բանակցային գործընթացից այն հիմքով, որ ինքը ղարաբաղցի է և կարող է ներկայացնել թե՛ Հայաստանը և թե՛ Արցախը։ Նման մոտեցումը վաղ թե ուշ պետք է բերեր Հայաստանի ճանաչմանը որպես օկուպանտի, ինչը և արեցին միջազգային կազմակերպությունները, այդ թվում, օրինակ, Եվրոմիությունը՝ 2013-ին։ Հենց դա էլ կանխորոշեց Արցախի խնդրի՝ Կոսովոյի օրինակով լուծելու անհնարինությունը գոնե մինչև 2020թ․ պատերազմը»:
