A1News.am-Hraparak.am-ի տեղեկություններով՝ հնարավոր է, որ փետրվարին «Գազպրոմ Արմենիան» գազի սակագնի բարձրացման հայտ ներկայացնի։ Սահմանին գազի գինը կմնա նույնը, բայց երկրի ներսում սպառողներին մատակարարվող գազի սակագինը կփոփոխվի, որի հիմնավորումների մեջ մի շարք գործոններ են ներառվելու, այդ թվում՝ «Գազպրոմ Արմենիա»-ի ծախսերը։
ՀԾԿՀ նախագահ Գարեգին Բաղրամյանը Hraparak.am-ի հետ զրույցում չի հերքել գազի սակագնի հնարավոր բարձրացման մասին տեղեկություններն ու հավանականությունը, թեև նշել է, որ այս պահին «Գազպրոմ Արմենիա»-ից դեռ հայտ չեն ստացել․ մինչև հայտն ուղարկելը պետք է այդ մտադրության մասին մամուլով հաղորդագրություն տարածեն։
«Ավելի շատ ոչ թե ծախսերի հետ է կապված խնդիրը, այլ այն միջգերատեսչական համաձայնագիրը, որը կա, որտեղ փոփոխություններ եղան «Հրազդան-5»-ի մասով, այնտեղ նախատեսված էր, որ արդեն ապրիլի 1-ից պետք է գործեին կալորիայի հաշվարկման մեխանիզմներ, որի բանաձևը կա, իհարկե, որ սահմանի գինը 7900 կիլոկալորիայի համար է, և փաստացի, սահմանի գնի և կալորիայի փոփոխության կամ ճշգրտման գործակից չէր կիրառվում, որն առանձին համաձայնագրերով միշտ ֆիքսվել է, որ այս տարի չկիրառել, մյուս տարի չկիրառել։ Հիմա էս վերջին համաձայնագրում գրված էր, որ պետք է լինեն մշակված մեխանիզմներ՝ մինչև ապրիլի 1-ը։ Բայց գինը սահմանին մնալու է նույնը, քանի որ առնվազն այդ մասով 10 տարվա համաձայնություն կա, և դա ուղղակիորեն կապի մեջ է դրած «Հրազդանի 5-րդ» էներգաբլոկի հզորության վճարի հետ։ Այսինքն՝ խոսքը սահմանին գազի գնի մեծության վերաբերյալ չէ, այլ փաստացի կալորիայիով ճշգտումներ իրականացնելու մասին է»,- ասել է Գարեգին Բաղրամյանը՝ նշելով, այս պահին փաստացի ավելի բարձր կալորիականության գազ է մտնում Հայաստան՝ մոտ 8 300 կիլոկալորիա (Կկալ)։
Ըստ Բաղրամյանի՝ սա նշանակում է, որ սահմանին գազի գինը նույնը կմնա բացարձակ արժեքով, բայց արդեն կալորիայի ճշգրտում կարող է կիրառվել, ինչը ենթադրում է, որ սահմանին 1000 խմ գազի դիմաց 165 դոլար արժեքի վրա կարող է կիրառվել գործակից՝ կախված նրանից, թե փաստացի ինչ կալորիայով գազ կմատակարարվի։
Այսինքն, կստացվի՝ Հայաստանի սպառողը իր ստացած ավելի կալորիաներով գազի համար ստիպված կլինի ավելի շատ վճարել։ Բացի դրանից, այլ գործոններ ևս կարող են ազդել գազի սակագնի բարձրացման վրա, եթե «Գազպրոմ Արմենիա»-ն որոշի սակագնի փոփոխության հայտ ներկայացնել։
«Եթե լինի սակագնի վերանայման հայտ, այն չի կարող վերաբերել միայն կալորիային։ Մենք նայում ենք նաև 2021 թվականին իրականացված կապիտալ ներդրումների վերադարձի հետ կապված խնդիրները, նայում ենք շահագործման ծախսերից որոնք են, որ արվել են, էնտեղ կան խնդիրներ գազանալիզատորների հետ, հիմա մոտեցումը փոխվել է՝ ոչ թե վերանորոգվում են, այլ ուղղակի փոխարինվում են, քանի որ դա ավելի մատչելի ու ավելի ճիշտ է, այսինքն՝ պետք է բոլոր գործոնները քննարկենք, հենց որ լինի հայտը»,-նշեց ՀԾԿՀ նախագահը։
Բաղրամյանը հիշեցրեց, որ հայտը ստանալուց հետո իրենց հանձնաժողովը մինչև 80 աշխատանքային օրվա ընթացքում պետք է ուսումնասիրի հայտն ու որոշում կայացի։ Ուստի, հաշվի առնելով այն, որ միջպետական համաձայնագրով ֆիքսված է, որ ապրիլի 1-ից պետք է կիրառվեն արդեն կալորիականության հետ կապված ճշգրտումները, ուստի հավանական է, որ փետրվարին «Գազպրոմ Արմենիան» կներկայացնի սակագնի փոփոխության հայտը։ Ըստ Բաղրամյանի՝ որպեսզի սակագինը փոխվի ապրիլի 1-ից, հանձնաժողովը պետք է ամենաուշը մարտի 1-ին արդեն որոշում կայացրած լինի, քանի որ որոշումն ուժի մեջ է մտնում 30 օր հետո։
Ըստ էության՝ ՀԾԿՀ նախագահը չբացառեց, որ գազի սակագնի բարձրացումն անխուսափելի է։
«Միանշանակ չեմ կարող պնդել, բայց նախադրյալներ կան»,-ասաց նա։
Միայն թե դժվարացավ ասել, թե նախնական քանի տոկոսով կամ քանի դրամով կբարձրանա գազի սակագինը․ «Մինչև չլինի հայտը, չեմ կարող ասել»։
Նշենք, որ «Գազպրոմ Արմենիան» սահմանին 165 դոլարով է ստանում գազը Ռուսաստանից, իսկ սպառողին մատակարարում է միջինը 220 դոլարով՝ 1000 խմ դիմաց (առանց ԱԱՀ)։ Այսինքն՝ այդ 222 դոլարն է ավելանալու։
