A1News.am-Այսօր՝ ապրիլի 19-ին, արտակարգ դեպք է տեղի ունեցել Երևանում: Ժամը 12:00-ի սահմաններում ՀՀ ոստիկանության օպերատիվ կառավարման կենտրոն ահազանգ է ստացվել, որ Շենգավիթ վարչական շրջանի թիվ 66 դպրոցում ռումբ է դրված: Նմանատիպ ահազանգ է ստացվել նաև Արտակարգ իրավիճակների նախարարության փրկարար ծառայության 911 ճգնաժամային կառավարման կենտրոն:
Ինչպես հայտնում է ֆոտոլրագրող Գագիկ Շամշյանը, նշված վայր են ժամանել ԱԻՆ ՓԾ Երևանի թիվ 2 հրշեջ-փրկարարական ջոկատից և թիվ 16 փրկարարական ջոկատից 1-ական հաշվարկ: Ժամանել է նաև ճգնաժամային կառավարման ազգային կենտրոնի օպերատիվ խումբը:
Ահազանգով ժամանել է նաև ոստիկանության Շենգավիթի բաժնի հերթապահ խումբը: Փրկարարները, պարեկներն ու ոստիկանները դպրոցի ղեկավարության հետ տարհանել են աշակերտներին: Տեղում ուժեղացված ծառայություն են կատարել ՀՀ ոստիկանության պարեկային ծառայության 4-րդ գումարտակի 1-ին վաշտի պարեկներ Հենրիկ Աբրոյանն ու Անդրանիկ Չոբանյանը:
Ժամանել է նաև գումարտակի հրամանատար Արմեն Գասպարյանը: Ժամանել է նաև Երևանի շտապօգնության բժիշկների հերթապահ խումբը: Գ. Շամշյանի տեղեկություններով՝ Շենգավիթի ոստիկանները պարզել են, որ ահազանգը կեղծ է և արդեն ճշտել են զանգահարողի ինքնությունը: Փաստի առթիվ ոստիկանության Շենգավիթի բաժնում նյութեր են նախապատրաստվում:
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: © shamshyan.com https://shamshyan.com/hy/article/2022/04/19/1211598/
