A1News.am-Փաստաթղթի 90 տոկոսը փակում են, ասում են՝ տեսեք, սա ապացույց, որ դավադրություն է տեղի ունենում. բա եթե դավադրություն է, ինչի՞ եք փակել տողերը, բացեք, թող բոլորը տեսնեն, որ դավադրություն է տեղի ունենում: Այս մասին, այսօր՝ մայիսի 20-ին, ԱԺ արտահերթ նիստում նշեց վարչապետի պաշտոնակատար Նիկոլ Փաշինյանը՝ անդրադառնալով գաղտանզերծված փաստաթղթին, որը նախատեսված է որ ստորագրեն Հայաստանը, Ադրբեջանն ու Ռուսաստանը:
«Ասում են՝ ինչու է վերեւում գրված հավելված: Ըստ էության վրիպակ է, պետք է լիներ նախագիծ: Դա մեծ ուշադրության չի արժանացել, որովհետեւ այնպես չի, որ սա բանակցված, ստորագրության դրված փաստաթուղթ է, որ էդ դետալներով մենք քննարկենք:
Ասում են՝ ժողովրդի թիկունքում ի՞նչ փաստաթուղթ եք ուզում ստորագրել: Դա նույն է, որ ասեք՝ ժողովրդի թիկունքում ՌԴ նախագահի հետ ի՞նչ հեռախոսազրույց եք ունենում: Հունվարի 11-ին Մոսկվայում եռակողմ հայտարարություն է ընդունվել եւ հրապարակվել, բա ինչի՞ չեն ծագել այդ նույն հարցերը: Կամ նոյեմբերի 9-ի հայտարարության մասին ընդդիմությունն ասում է՝ հակապետական է, պետք է վավերացվեր ԱԺ-ում, բայց մենք որ լինենք իշխանություն, չենք չեղարկելու դա:
Ասում են՝ ԱԳՆ-ն տեղյակ չի: Այդ փաստաթղթերը ստացվում են ԱԳՆ խողովակներով: Ես ո՞նց եմ ստանում դա, կարո՞ղ է մեկը բացատրի: Դա տրվում է ՌԴ-ում Հայաստանի դեսպանատուն, դեսպանատունն ուղարկում է ԱԳ նախարարություն, նախարարն էլ՝ ինձ»,-ասաց նա:
Փաշինյանը հավելեց, որ այս բանակցությունների ընթացքում Ադրբեջանի կողմից ձեւակերպվող թեզեր կան, որ ինքը նախ մեր ընդդիմության ներկայացուցիչներից է լսում:
Նա անդրադարձավ նաեւ սահմանազատմանը՝ նշելով. «Հայաստանն այսօր արցախյան առաջին պատերազմից հետո Խորհրդային Հայաստանի ավելի քան 70 քառակուսի կլիոմետր գտնվում է Ադրբեջանի վերահսկողության ներքո: Այսօր սահմանամերձ գյուղեր ունենք, որ 30 տարի այդ գյուղերը չունեն վարելահող, որովհետեւ իրենց հողերը օկուպացված են: Այո, մենք էլ ունենք Սովետական Ադրբեջանին պատկանած տարածքներ, որոնք գտնվում են մեր ԶՈՒ հսկողության ներքո: Ավելին ասեմ, դեռեւս 1990-ականներից կան Ադրբեջանի մարտական դիրքեր, որոնք գտնվում են Սովետական Հայաստանի տարածքում: մենք հիմա պետք է խոսենք, հասկանանք, թե ինչ ենք անում: Կան ամենատարբեր տարբերակներ: Օրինակ, եղած վիճակը արձանագրում ենք որպես պետական սահման: Երբ խոսում են անկլավների մասին, ինչի՞ չենք հիծում, որ մենք ունենք Արծվաշենի հարց»,-ասաց Փաշինյանը:
Նա անդրադարձավ նաեւ հարցին, թե արդյոք դրանով Ղարաբաղի հարցը եւս փակվում է. «1991 թվականի դեկտեմբերին, երբ Ալմա Աթայում ընդունվեց ԱՊՀ ստեղծման հռչակագիրը, դրանով կողմերը ճանաչեցին միմյանց տարածքային ամբողջականությունը եւ սահմանների անխախտելիությունը: Եթե այս առումով խնդիր կա, այդ խնդիրը ստեղծվել է 1991-ին: Եթե այստեղ խնդիր կա, դա ստեղծվել է 2010-ին, երբ այս դահլիճում ընդունվել է վարչատարածքային բաժանման մասին օրենքը:
Հարց է հնչում, թե չենք կարո՞ղ այս գործընթացն իրականացնել ընտրություններից հետո: Այսինքն այս իշխանությունը պետք է ասի՝ Հայաստանում իշխանություն չկա, զորքերն եկել են, ոչինչ, թող մնան, մենք չենք զբաղվում այս հարցով, ընտրություններից հետո կլուծենք: Հետո քարոզարշավի ժամանակ մի տեղից էլ մտնեն: Հետո ստիպված լինենք ռազմական դրություն մտցնել:
Ինչպե՞ս է ստեղծվելու այդ հանձնաժողովը: Դեռեւս 2020-ի նոյեմբերին ՀՀ-ում ստեղծվել է սահմանազատման հարցերով միջգերատեսչական հանձնաժողով, որի մասին ԱԳ նախարարը կրկին տեղյակ չէ, որովհետեւ այն ղեկավարում է ԱԳ փոխնախարարը:
Ասում են, որ սա պետք է վավերացվի ԱԺ-ի կողմից: Իսկ երբ ասենք հունվարի 11-ին հայտարարություն է ընդունվել, որ եռակողմ հանձնաժողով է ստեղծվում հաղորդակցության ուղիների բացման հարցերով, ինչո՞ւ այդ ժամանակ այս աղմուկը չի եղել: Վավերացման անհրաժեշտություն չկա, պետք է խոսել արդյունքների վավերացման մասին:
Բա 30 տարի Ղարաբաղի մասին բանակցում էին, թող Միշիկը դա ինտերնետում դներ, ասեր՝ հայրիկը որոշել է 7 շրջաններն առանց նախապայմանի վերադարձնի»,-հայտարարեց վարչապետի պաշտոնակատարը՝ հավելելով, որ մենք իրոք դժոխային ճանապարհի միջով ենք անցնում, բայց պետք է անցնենք այս ճանապարհը:
