A1News.am-ԱՄՆ նախագահ Ջո Բայդենը հայտարարել է, որ ԱՄՆ-ի եւ ՆԱՏՕ-ի դաշնակիցներն Ուկրաինայում չեն պատերազմի Ռուսաստանի դեմ։ Նա նման սցենարն անվանել է «երրորդ համաշխարհային պատերազմ», հաղորդում է The Hill-ը։
«Մենք կպաշտպանենք ՆԱՏՕ-ի տարածքի յուրաքանչյուր դյույմ՝ միասնական եւ ոգեշնչված ՆԱՏՕ-ի ողջ ուժով»,- ասել է Բայդենը՝ Ռուսաստանի դեմ լրացուցիչ պատժամիջոցների մասին հայտարարելուց հետո։ «Ուկրաինայում մենք չենք պատերազմի Ռուսաստանի դեմ։ Մենք պետք է կանխենք ՆԱՏՕ-ի եւ Ռուսաստանի միջեւ ուղիղ հակամարտությունը, դա երրորդ համաշխարհային պատերազմն է»,- ասել է նա։
Ամերիկացի որոշ օրենսդիրներ առաջ են քաշում Ուկրաինայի վրա ոչ թռիչքային գոտի ստեղծելու հնարավորությունը, որը Սպիտակ տան պաշտոնյաները բացառել են, քանի որ այն կներգրավի ԱՄՆ-ի եւ դաշնակից ուժերին, որոնք կարող են խոցել ռուսական ինքնաթիռները Ուկրաինայի օդային տարածքում:
Բայց Բայդենը եւ նրա թիմն ասում են, որ մտադիր չեն զորքեր ուղարկել Ուկրաինա՝ Ռուսաստանի դեմ պայքարի համար։ Բայդենը նաեւ ասել է, որ Ռուսաստանը «լուրջ գին» կվճարի, եթե քիմիական զենքով հարձակում իրականացնի։
