Բերեցին ինտերնետով նկարը ցույց տվեցին, ասացին զոհվել է, շոկի մեջ էի․ սահմանին զոհված Արթուր Մխիթարյանի մարզիչը՝ հերոսի մասին

Իրադարձային a1news 2022-01-12 21:54:00 2580
Հետևեք մեզ՝ Telegram-ում
befunky-collage-4_X049P.jpg

A1News.am-Երեկ՝ հունվարի 11-ին, հայ-ադրբեջանական սահմանի արևելյան ուղղությամբ ադրբեջանական ստորաբաժանումների իրականացրած սադրանքի հետեւանքով զոհեց 20–ամյա շարքային Արթուր Արտյոմի Մխիթարյանը։

Արթուրը Գյումրիից էր։  Բանակ էր զորակոչվել 2021-ի մարտին։ Արթուրը հունահռոմեական ոճի ըմբշամարտիկ էր, Արթուր Ալեքսանյանի անվան մարզադպրոցի սան։

«Ես աշակերտներիս հետ ուսումնամարզական հավաքների եմ Ծաղկաձորում։ Իմ աշակերտների մեջ Արթուրի ընկերներից էլ կային, բերեցին ինտերնետով նկարը ցույց տվեցին,ասացին զոհվել է, շոկի մեջ էի»,-Zarkerak.am-ի հետ զրույցում ասում է Արթուրի մարզիչը՝ Անդրանիկ Գևորգյանը․ արդեն 2 օր է՝  չի կարողանում հավատալ, որ Արթուրը զոհվել է։

«Ընկերներն էլ էին շոկի մեջ, չէին կարողանում խոսել։ Լացելով զանգեցին մյուս ընկերներին։Լավ ընկեր կորցրին»,- խորը հոգոցով պատմում է Գևորգյանը։

«Արթուրը 8-9 տարեկանից եկավ մարզադպրոց։ Շատ շնորհքով, խելոք, պարտաճանաչ էրեխա էր»,-հիշում է  Գևորգյանը, ով օգնել է Արթուրին առաջին քայլերն անել սպորտում։

Հետո նկատում է, որ Արթուրի հետ խիստ լինելու առիթներ այդպես էլ չեղան․ «Ինչի՞ պիտի խիստ լինեի, դասերից չէր բացակայում, նորմալ հաճախում էր պարապմունքների։ Միայն ասում էի, որ լավ պարապի, բարձր արդյունքներ ունենաս»։

Արթուրը սպորտով զբաղվելու ընթացքում մարզիչ Գևորգյանին հպարտանալու շատ առիթներ է տվել․ «Արթուրը  Հայաստանի հունահռոմեական ըմբշամարտի առաջնություններում մեդալակիր է եղել»։

Մարզիչն ասում է՝ Արթուրը կարող էր հետագայում էլ սպորտում հաջողություններ ունենալ ․«Սպորտում  պլաններ ուներ, որ պետք է ծառայությունից հետո իրականացներ։ Բայց չհասցրեց »։

Համեստ, ընկերասեր, շնորհքով, մեծին հարգող  ու լսող, ահա թե ինչպես է հիշում Անդրանիկ Գևորգյանը Արթուրին։ Վերջին հանդիպումն էլ ամռանն էր, երբ Արթուրը արձակուրդ էր եկել․ «Եկավ մարզադպրոց։ Հանդիպեց մարզիչներին, էրեխեքին։ Պատմում էր ծառայության մասին, Արթուրը շատ հայրենասեր էր,պատրաստ նվիրումի », -պատմում է Անդրանիկ Գևորգյանը ։

Գևորգյանն ասում է՝ Արթուրը  գոհ էր ծառայությունից, բողոքներ Արթուրից երբեք չեն լսել․ հետո ավելացնում․«Ինքը էդ երեխեն չէր որ բողոքեր, հարմարվող էր»։

Поделиться
Класс
Send