A1News.am-Lragir.am-ը գրում է.Հունվարի 14-ին Վիեննայում ԵԱՀԿ գրասենյակում նախատեսված են ԱՄՆ-Ռուսաստան խորհրդակցություններ։ Կողմերը կանդրադառնան անվտանգության եվրոպական կառուցվածքին, մանդատներին ու ընդհանուր անվտանգության երաշխիքներին։ Մինչ այդ, ԱՄՆ-Ռուսաստան եւ ՆԱՏՕ-Ռուսաստան հանդիպումներում մերժվել են Մոսկվայի պահանջները։
Հունվարի 10-ին Հայաստանի արտգործնախարար Արարատ Միրզոյանը հեռախոսազրույց է ունեցել ԵԱՀԿ նախագահությունը ստանձնած Լեհաստանի արտգործնախարար Զբիգնև Ռաուի հետ։
Նրանք քննարկել են Ղազախստանում տիրող իրավիճակը, և հայ նախարարը փորձել է բացատրել, թե ինչի հիման վրա է Հայաստանը՝ որպես ՀԱՊԿ նախագահող, որոշել խաղաղապահներ ուղարկել Ղազախստան։ ԱՄՆ-ն ու ԵՄ-ն հենց սկզբից խոսում էին այս որոշման լեգիտիմության մասին, և այդ մասին Ռուսաստանի հետ անպայման կխոսեն Վիեննայում։ Իսկ ԵԱՀԿ նոր նախագահը Երեւանից պարզաբանում է պահանջել՝ ինչպե՞ս է այս գործողությունը տեղավորվում եվրոպական անվտանգության կառուցվածքում, որի պատասխանատուն ԵԱՀԿ-ն է։
Միրզոյանը Ռաուին հիշեցրել է տարածաշրջանային անվտանգության մասին և ընդգծել ԼՂ հիմնախնդրի խաղաղ կարգավորման անհրաժեշտությունը՝ ԵԱՀԿ Մինսկի խմբի համանախագահության մանդատի շրջանակներում։
Ստացվում է, որ Հայաստանը, որը Ղազախստան զորքեր է ուղարկել ԵԱՀԿ սկզբունքներին հակառակ, ԵԱՀԿ-ից ակնկալում է Արցախյան հիմնախնդրի լուծում։
Ի դեպ, նույն օրն Արցախում միանգամից երեք միջադեպ է տեղի ունեցել՝ Մարտունու և Ասկերանի շրջաններում և Շուշիի մերձակայքում։ Արցախի իշխանությունն աջակցություն էր հայտնել ՀԱՊԿ զորքերը Ղազախստան ուղարկելուն՝ նշելով, որ «արմատական պանթուրքիստական շրջանակների» գործողությունները կանխելու համար «ամենաարդյունավետ մեխանիզմը ՀԱՊԿ խաղաղապահ ուժերի ուղարկումն էր Ղազախստան»։
Ինչպե՞ս են հայկական պետությունները պատկերացնում մանդատների բաժանումը ԵԱՀԿ-ի, ՀԱՊԿ-ի, ռուսական զորքերի և այլ ուժերի միջև։ Եվ ինչպե՞ս է Երեւանը պատկերացնում Արցախի հարցի լուծումը ԵԱՀԿ շրջանակներում Հայաստանի՝ Ղազախստան զորք մտցնելու որոշումից հետո։