A1News.am-Ռուսաստանի արտաքին գործերի նախարարությունը հանդես է եկել հայաստանյան իրադարձությունների մեկնաբանությամբ, տեղեկացնում է Առկա գործակալությունը։
«Սա Հայաստանի ներքին գործն է, մենք շահագրգռված ենք դաշնակից հանրապետության անվտանգ և խաղաղ զարգացմամբ: Մենք ելնում ենք նրանից, որ երկրի ներքաղաքական կյանքի բոլոր հարցերը պետք է լուծվեն բացառապես իրավական և սահմանադրական դաշտում, համապատասխան ժողովրդավարական ընթացակարգերով», ուրբաթ օրը կայացած ճեպազրույցի ժամանակ ասել է ՌԴ ԱԳՆ տեղեկատվության վարչության փոխտնօրեն Ալեքսեյ Զայցևը։
Ինչ վերաբերում է ընթացիկ իրադարձությունները հայ-ադրբեջանական հարաբերությունների կարգավորման գործընթացի հետ կապելուն, նա նշել է, որ Ռուսաստանի ընկալմամբ խոսքը ոչ թե ձեռք բերված եռակողմ պայմանավորվածություններին ընդդիմության վերաբերմունքի, այլ Հայաստանի ղեկավարության կողմից որոշակի հայտարարությունների ընկալման մասին է։
«Այս առումով ես կցանկանայի ուշադրություն հրավիրել այն փաստի վրա, որ մենք մշտապես հավատարիմ ենք ակտիվորեն նպաստելու Հայաստանի և Ադրբեջանի միջև հարաբերությունների կարգավորմանը՝ առաջին հերթին եռակողմ հայտարարությունների բոլոր դրույթների կատարման, ինչպես նաև Երեւանի եւ Բաքվի միջեւ խաղաղության համաձայնագրի կնքմամբ», ասել է Զայցեւը, տեղեկացնում է Առկան։
ՌԴ ԱԳՆ-ն արձանագրում է, որ հայաստանյան ընդդիմությունը հավատարիմ է եռակողմ հայտարարությունների իրագործմանը։ Հիշատակելով ՀՀ ղեկավարության հայտարարությունները, ՌԴ ԱԳՆ-ն նկատի ունի Փաշինյանի այն հայտարարությունը, ըստ որի՝ «միջազգային հանրությունը պահանջում է իջեցնել Արցախի կարգավիճակի նշաձողը», ինչն էլ ընդդիմության բողոքի ցույցերի ֆորմալ առիթն էր։
Հասկանալի է, որ «միջազգային հանրություն» ասելով՝ Փաշինյանը նկատի ուներ եռակողմ հայտարարության հեղինակների ու շահառուների՝ Մոսկվայի եւ Բաքվի պահանջները, որքան էլ ռուս-հայկական մամուլում փորձ արվեց դա վերագրել ՄԽ արեւմտյան համանախագահներին։ Ինքը ՌԴ ԱԳ նախարար Լավրովը խոստովանեց, որ Ֆրանսիան ու ԱՄՆ-ն ՄԽ-ում պաշտպանում էին հայկական շահերը։ Ավելի վաղ Պուտինը հայտարարել էր, որ Ղարաբաղի խնդիրը լուծված է, կարգավիճակի խնդիր չկա։ ՌԴ ԱԳՆ ներկայացուցիչի վերոբերյալ մեկնաբանության մեջ նույնպես խոսք չկա Ղարաբաղյան կարգավորման մասին։
ՌԴ ԱԳՆ արձագանքը հայաստանյան ներկայիս իրադարձություններին ուշագրավ է՝ ստացվում է ընդդիմությունը համաձայն է, իսկ ՀՀ իշխանությունը փորձում է դիմադրե՞լ։ Թե՞ խնդիրն ընդամենն այն է, որ ՀՀ իշխանությունը «բերանից թռցրել» է կարեւոր տեղեկությունը։
