A1News.am-1in.am-ը գրում է.Հայաստանի ներքաղաքական կյանքում տեղի ունեցողը ի թիվս իր անկասկած մի քանի շերտավորումների, խոշոր հաշվով նաև պարունակում է Հայաստանում «չավարտված հեղափոխության» հանգամանքը, կամ այլ կերպ ասած՝ 2018-ի թավշյա հեղափոխության «շարունակություն» է: Հեղափոխություն, որը ընդհատվեց կորոնավիիրուսի համաճարակի և Արցախի ու Հայաստանի դեմ 44-օրյա պատերազմի հետևանքով: 2018-ի իրադարձություններն իհարկե հանրային տարբեր շերտեր գննահատում են տարբեր կերպ, հատկապես ժամանակի անցնելուն զուգահեռ:
Ոմանք դա չեն համարում հեղափոխություն՝ այլ ընդամենը իշխանափոխություն, ոմանք համարում են իշխանազավթում, հնչում են նաև այլ գնահատականներ՝ տարաբնույթ: Այդ ամենից սակայն չի փոխվում տեղի ունեցածծի էությունը, այն է՝ Հայաստանում մեկնարկել է համակարգային խորքային փոփոխության չափազանց բարդ գործընթաց, որը ավարտված չէ մի շարք թե օբյեկտիվ, թե սուբյեկտիվ պատճառներով:
Եթե անգամ չլիներ կորոնավիրուսն ու պատերազմը, միևնույն է, գործընթացը չէր լինելու ավարտված, քանի որ թե Հայաստանի ներքին իրադրությունը, թե հայկական սփյուռքի կառուցվածքը, և թե Հայաստանի ու սփյուռքի հանդեպ միջազգային իրադրությունը բացարձակապես միատար կամ պարզ չեն, կամ այլ կերպ ասած՝ սև ու սպիտակ չեն: Պարզապես, միջավայրն էլ ավելի բարդացրին կորոնավիրուսային համաճարակը՝ այդ թվում իր միջազգային ադեզցության մասշտաբով, և թե 44-օրյա պատերազմը: Իսկ այժմ, իրադրության վրա ահռելի ազդեցություն ունի պատերազմը Ուկրաինայում:
2018-ի հայկական հեղափոխական գործընթացը շարունակվում է այդ պայմաններում, մտնելով իր նոր շրջափուլ, որը թվային առումով կարող է համարվել երկրորդ, երրորդ կամ չորորդ, էականը թերևս դա չէ: Ճակատային դերակատարները շարունակում են մնալ նույնը՝ նախկին համակարգ և նոր իշխանություն: Գործնականում նույնն է մնում նաև խնդիրը՝ Հայաստանի բազմաբնույթ մարտահրավերների ֆոնին ներքին խաղի կանոնների, համակեցության պայմանների և մշակույթի տոտալ բացակայություն և սեփականության լեգիտիմության շարունակվող ճգնաժամ: Սրանց հարցում լուծումների և դրանց իրագործման մեխանիզմների վերաբերյալ համակարգային պատկերացումների բացակայությունը եղել է, ու շարունակում է լինել 2018-ի գործընթացի գլխավոր բացը, ինչի վրա լցվող «յուղ» է դառնում արտաքին միջավայրի ցանկացած լարում: