Հայաստանի կառավարությունը տեղյակ չէ, թե խաղաղության ինչ պայմանագրի մասին է խոսում Ալիևը

Լուրեր a1news 2021-08-05 12:21:00 405
Հետևեք մեզ՝ Telegram-ում
6b9c8c606867dc4ce70b63c7f98178a4_qCEVx.jpg

A1News.am-Hetq.am-ը գրում է. Հայաստանի Հանրապետության կառավարությունը տեղյակ չէ, թե խաղաղության ինչ պայմանագրի մասին է խոսում Ադրբեջանի նախագահ Իլհամ Ալիևը։ Այդ մասին հայտնել է ՀՀ կառավարությունը` վարչապետ Նիկոլ Փաշինյանին «Հետք»-ի ուղղած հարցմանն ի պատասխան։ 

Հիշեցնենք, որ այս տարվա հուլիսի 22-ին, ադրբեջանական լրատվամիջոցներին տված հարցազրույցի ժամանակ, Իլհամ Ալիևը հայտարարել էր, թե ադրբեջանական կողմը Հայաստանին առաջարկել է սկսել սահմանազատման բանակցություններ և կնքել խաղաղության պայմանագիր։ «Մենք Հայաստանին օրակարգ ենք ուղարկել` խաղաղության պայմանագիր:

Թող ասեն, որ չեն ուզում, թող հրաժարվեն: Ես իմ կողմից բազմիցս ասել եմ, հիմա էլ կրկնում եմ` Ադրբեջանը պատրաստ է այս հարցի շուրջ բանակցությունների: Պատերազմն ավարտվել է, ուզո՞ւմ եք խաղաղություն, կարծես թե` այո, ուրեմն` ճանաչեք Ադրբեջանի տարածքային ամբողջականությունը, թող ստորագրվի խաղաղության պայմանագիր և լուծվի սահմանազատման հարցը»,- հայտարարել էր Ալիևը։

Ալիևի հայտարարությունից ստացվում է, որ արդեն իսկ գոյություն ունի Ադրբեջանի կողմից մշակված խաղաղության փաստաթղթի նախնական տարբերակ, հավանաբար ռուսական և թուրքական կողմերի ներգրավվածությամբ, որն ուղարկվել է հայկական կողմին քննարկման համար։ ՀՀ կառավարությունը, փաստորեն, հերքում է նման փաստաթղթի գոյությունը։ 

Սա կարելի էր համարել Ադրբեջանի նախագահի հերթական ռազմատենչ հայտարարությունը, եթե Հայաստանի Պաշտպանության նախարարությունն իր հաղորդագրություններից մեկում չհրապարակեր մի հանգամանք, որը մինչ այդ անհայտ էր և չէր բարձրաձայնվել որևէ մակարդակով։ Մասնավորապես, ՀՀ պաշտպանական գերատեսչության հուլիսի 28-ի հաղորդագրություններից մեկում, որը վերաբերում էր հայ-ադրբեջանական շփման գծի Սոթք-Վերին Շորժա հատվածում ընթացող մարտերին, նշվում է.

«Հակառակորդը, ՌԴ մայրաքաղաք Մոսկվայում նախատեսվող բանակցություններից առաջ, նախահարձակ մարտական գործողություններ է սկսել ՀՀ սահմանների վրա` Սոթքից մինչև Վերին Շորժա հատվածում։ Ծավալվել են մարտական գործողություններ, ընթանում է ինտենսիվ փոխհրաձգություն»։ 

Թե ինչ բանակցությունների մասին է նշում պաշտպանական գերատեսչությունը, անհասկանալի է։ Անհայտ է, թե ինչ օրակարգով ու մակարդակով են ընթանալու մոսկովյան այդ բանակցությունները։ Մինչ օրս չկա որևէ մեկնաբանություն այս առնչությամբ։ Վարչապետից հետաքրքրվել էինք նաև, թե ինչ պայմանավորվածությունների արդյունքում է հուլիսի 28-ի առավոտյան հրադադար հաստատվել հայ-ադրբեջանական շփման գծում։ Հարցման պատասխանում Կառավարությունը միայն նշել է, որ հրադադարի ռեժիմի հաստատման և պահպանման վերաբերյալ պայմանավորվածությունները ձեռք են բերվել Ռուսաստանի միջնորդության արդյունքում: Պայմանավորվածությունների մանրամասները կառավարությունը չի տրամադրել։

Կառավարությունը նաև ընդգծել է, որ ՀՀ իշխանություններն իրենց հայտարարություններում նշել են այն հիմնական գործողությունները, որոնց առկայության դեպքում տարածաշրջանում հնարավոր կլինի բարենպաստ պայմաններ ստեղծել հարատև և կայուն խաղաղության, հակամարտության համապարփակ և տևական կարգավորման հասնելու ուղղությամբ։ Դրանք են` ԵԱՀԿ Մինսկի խմբի համանախագության շրջանակներում ղարաբաղյան խաղաղ կարգավորման գործընթացի վերսկսումը, եռակողմ հայտարարություններով ստանձնած պարտավորությունների` առանց նախապայմանների իրականացումը, ադրբեջանական զինված ուժերի հետքաշումը 2021 թվականի մայիսի 11-ի դրությամբ առկա ելման դիրքեր, ռազմագերիների, պատանդների և այլ պահվող անձանց անմիջապես հայրենադարձումը։

Поделиться
Класс
Send