A1News.am-Lragir.am-ը գրում է.Բոլոր երկրներն առաջին հերթին պետք է կատարեն իրենց պարտավորությունները (ըստ եռակողմ պայմանագրերի), սա երաշխիք կլինի, որ նման միջադեպերը չեն կրկնվի, հայտարարել է ՌԴ նախագահի խոսնակ Դմիտրի Պեսկովը, անդրադառնալով հայ-ադրբեջանական սահմանի իրավիճակին: Պեսկովը հայտարարել է, որ բախումը մտահոգիչ է եղել Ռուսաստանի համար և Մոսկվան քայլեր է ձեռնարկել իրավիճակը կայունացնելու համար և հետագայում էլ կանի դա:
Պեսկովի հայտարարությունը, թե կողմերը պետք է կատարեն իրենց պարտավորությունը, հայ-ադրբեջանական սահմանին տեղի ունեցած լարվածության բռնկմանը միջազգային արձագանքի «հավասարության նշանի» հերթական դրսևորումներին մեկն է:
ԵԱՀԿ Մինսկի խմբի բոլոր երեք համանախագահ երկրների արձագանքները, այդ թվում ԱՄՆ պետքարտուղարի, Ֆրանսիայի արտգործնախարարության մակարդակով, կրել են երկու կողմերի միջև հավասարության նշան, կոչ անելով երկուսին էլ քայլեր ձեռնարկել լարվածությունը թուլացնելու և բանակցություն սկսելու ուղղությամբ: ԱՄՆ պետքարտուղար Բլինքենը որպես բանակցության առարկա մատնանշել էր նաև սահմանազատման-սահմանագծման գործընթացը: Հետաքրքիր է, ԱՄՆ-ը արդյոք ի՞նչն է տեսնում այդ գործընթացի ձևաչափ՝ Ռուսաստանի միջնորդությունը, թե՞ Մինսկի խմբի համանախագահությունը:
Միաժամանակ ուշադրության է արժանի, որ Բլինքենը անդրադառնալով սահմանային իրավիճակին, հղում է անում Մինսկի խմբի նոյեմբերի 15-ի հայտարարությանը, մասնավորապես դրա այն հատվածին, ինչի վրա ուշադրություն բևեռել էի նախօրեին հրապարակված հոդվածում. «Ինչպես նշվում է ԵԱՀԿ Մինսկի խմբի համանախագահների նոյեմբերի 15-ի հայտարարությունում, Հայաստանի և Ադրբեջանի միջև լարվածության վերջին աճն ընդգծում է Լեռնային Ղարաբաղի հակամարտությանն առնչվող կամ դրանից բխող մնացյալ հարցերի բանակցային, համապարփակ և կայուն կարգավորման անհրաժեշտությունը», մեջբերում է Բլինքենը: Սա թույլ է տալիս խոսել այն մասին, որ իրավիճակի հետագա զարգացման տրամաբանության առումով երեք համանախագահները ունեն որոշակի ընդհանուր մոտեցում, իհարկե մեծ հավանականությամբ կարճաժամկետ, տակտիկական տրամաբանությամբ: Այստեղ առանցքային հարցն այն է, թե կողմերին ուղղված «հավասար» կոչերի համատեքստում ինչ են ակնկալում Բաքվից և ինչ են ակնկալում Երևանից: Դրանք նու՞յն քայլերն են, թե՞ յուրաքանչյուր կողմից կա տարբեր ակնկալիք:
