A1News.am-Lragir.am-ը գրում է. Մոկվան շիկացնում է ռազմական եւ քարոզչական իրավիճակն Ուկրաինայի շուրջ, բարձրացնելով պաղադրույքները։ Հայտնի է դարձել, որ Բելառուսում ռուսական զորքի զորավարժությունները երկարաձգվում են։
Զորավարժություններ են անցկացրել նաեւ ռազմավարական զսպման ուժերը։ Պուտինը Մակրոնի հետ հեռախոսազրույցում ասել է, որ Արեւմուտքը պետք է լուրջ վերաբերվի ռուսական պահանջներին։ Փետրվարի 22-ին Պետական դուման քննարկելու է Դոնբասի ինքնահռչակ հանրապետությունների ճանաչման հարցը՝ Աբխազիայի ու Հարավային Օսիայի օրինակով։
Խոսվում է նաեւ այդ օրերին Ուկրաինայի դեմ խոշոր սադրանքների կազմակերպման մասին։
Պուտինն առայժմ ձգձգում է Դոնբասի ինքնահռչակ հանրապետությունների ճանաչման հարցը, փորձելով իրավիճակի շիկացմամբ, պատերազմի, այդ թվում միջուկային, սպառնալիքով հասնել իր պահանջների կատարմանը։ Հակառակ պարագային, ճանաչումից բացի նախատեսվում են ռազմական գործողություններ՝ Ուկրաինային հրթիռային հարվածներով եւ նոր տարածքներ գրավելով։
Մոսկվան արդեն բացահայտ խոսում է իր իրական ու հիմնական պահանջի մասին՝ ԱՄՆ-ին առաջարկելով աշխարհի վերաբաժանում «պանյատներով»՝ հաշվի չառնելով միջազգային կարգն ու սկզբունքները։ Պուտինը դա արդեն իրագործել է Սիրիայում, Հայաստանում, աֆրիկյան մի շարք երկրներում, ներկայում՝ Ուկրաինայում։ Պուտինն ու Լավրովն անցել են բանդիտական բառապաշարի՝ թերեւս ռուսական դիվանագիտությունն ու պահանջները լիարժեք պարզաբանելու համար։
