A1News.am-Երևանի քաղաքապետն ակնկալում է, որ իրավապահ մարմինները կոշտ արձագանք կտան հանցագործությանը։
Երևանի քաղաքապետ Հայկ Մարությանն այսօր ավագանու նիստի ժամանակ խոսեց «Իմ քայլը» խմբակցության անդամ Արման Անտոնյանի մասին, որը դաժան ծեծի էր ենթարկվել օգոստոսի 1-ին։
Մարությանի խոսքով` Անտոնյանն արդեն տեղափոխվել է հիվանդասենյակ, դրական դինամիկա կա, կյանքին վտանգ չի սպառնում:
Քաղաքապետը հայտարարեց` իրավապահ մարմիններից ու դատական համակարգից ակնկալում է, որ կոշտ և համարժեք գնահատական կտան այդ հանցագործությանը։
«Արդեն պարզ է, որ այդ հարձակումը կապված է Անտոնյանի մասնագիտական գործունեության հետ, նպատակը որոշակի անձնական հարցեր լուծել էր։ Այնուամենայնիվ, բոլոր այն առաջարկությունները, որոնք նախկինում արել է ավագանու անդամը, ուղղված են եղել համայնքի շահերի պաշտպանությանը», - ասաց Մարությանը։
Քաղաքապետը վստահեցրեց` նրանք, ովքեր փորձում են նման ձևով ինչ-որ անձնական, նեղ խմբակային շահեր լուծել, ոչնչի չեն հասնի։ Մարությանը հիշեց տարածված արտահայտությունը. «Այն, ինչը մեզ չի սպանում, մեզ ավելի ուժեղ է դարձնում»։ Նա համոզված է, որ «Իմ քայլը» ուժեղ թիմ ունի։
Հիշեցնենք` օգոստոսի 1-ին՝ գիշերը ժամը 1։00-ի, մոտակայքում դիմակավորված անձինք մահակներով և դանակներով ներխուժել են Երևանի ավագանու «Իմ քայլը» խմբակցության անդամ Արման Անտոնյանի` Կոտայքի մարզում գտնվող տուն, դաժան ծեծի ենթարկել և դանակահարել նրան։
