A1News.am-Այսօր՝ փետրվարի 16-ին, հերթական գողության դեպքն է տեղի ունեցել Երևանում: Ժամը 05:30–ի սահմաններում 2 անհայտ անձինք քարով կոտրել են Դավթաշեն 3-րդ թաղամասի Տիգրան Պետրոսյան 21 հասցեում գործող «Այքեյս» խանութի դռան ապակին, մտել ներս, որոշ բաժիններ տակնուվրա արել, ապա կատարել գողություններ և հեռացել:
Ահազանգով ժամանել է ոստիկանության Դավթաշենի բաժանմունքի օպերատիվ խումբը, սակայն ոստիկանները կարծիք են հայտնել, որ գողերը իրենց կամքից անկախ հանգամանքներում հանցագործությունն ավարտին չեն հասցրել և ոչինչ չգողանալով, հեռացել են:
Ինչպես հայտնում է ֆոտոլրագրող Գագիկ Շամշյանը, խանութում տեղադրված տեսախցիկը արձանագրել է հանցագործության պահը, որով խանութին ոչ միայն նյութական վնաս է պատճառվել, այլ նաև գողացել են տարբեր մոդելների բարձրախոսներ: Խանութին պատճառվել է մոտ 300 հազար դրամի վնաս:
Փաստի առթիվ ոստիկանության Մաշտոցի բաժնի հետաքննական բաժանմունքում նյութեր են նախապատրաստվում:
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով' դատարանի' օրինական ուժի մեջ մտած դատավճռով: Լուսանկարները՝ Կարեն Գրիգորյանի
