A1News.am-Ինդոնեզիայի Հարավային Սուլավեսի նահանգում բռնել ու սպանել են 7-մետրանոց ցանցավոր պիթոնի, որը կասկածվում էր մարդակերության համար, գրում է Newsflare-ը:
Ագուս անունով տեղացի բնակիչներից մեկը պատմել է, որ իր կրտսեր եղբայրը նկատել է պիթոնին, երբ նրանք անտառ են մտել ծառախեժ հավաքելու համար: Դատելով սողունի ուռած փորից՝ օձը նախկինում մեծ բան է կուլ տվել:
«Մեր կարծիքով՝ նա կուլ է տվել ինչ-որ մեկի երեխային»,- վստահեցրել է տղամարդը:
Ակուսը և տեղի մյուս բնակիչները պիթոնին պարաններով կապել և անտառաից դուրս են հանել: Այնուհետև նրանք բացել են սողունի որովայնը և ներսում ընտանի կենդանու մնացորդներ հայտնաբերել:
«Տեղացիներից շատերը վերջին շրջանում կորցնում էին ընտանի կենդանիներին»,- բացատրել է Ագուսի եղբայրը՝ Վավան, և հավելել՝ իրենք կասկածել են, որ հենց օձերն են եղել դրանց անհետացման պատճառը:
Նշենք՝ ցանցավոր պիթոնները տարածված են Հարավային և Հարավարևելյան Ասիայում: Նրանք համարվում են աշխարհի ամենամեծ օձերը, քանի որ սողունների երկարությունը կարող է գերազանցել 7 մետրը:
Հիշեցնենք՝ դեռևս 2017 թվականին այս տեսակին պատկանող հսկայական պիթոնը Ինդոնեզիայի Սուլավեսի կղզում ամբողջովին կուլ էր տվել չափահաս տղամարդու: Երբ օձի փորը բացել էին, դրա ներսում հայտնաբերվել էր մահացածի մարմինը: Հենց այս պատճառով է, որ այս օձերը շատ հաճախ կասկածվում են մարդակերության համար:
Տեսանյութը կարող եք դիտել այստեղ:
