A1News.am-Օրերս հանրային հնչեղություն ստացավ «Menu.am»-ի առաքիչի հետ կապված դեպքը։ «KIM YUM» ռեստորանի հաճախորդներից մեկը նկատել էր և այդ մասին ֆեյսբուքյան գրառում կատարել, թե ինչպես է ռեստորանի մենեջերը արգելում «Menu.am»-ի առաքիչին՝ «սառած ու կարմրած ձեռքերով ու դեմքով մոտ 50 տարեկան տղամարդուն», որը ներս էր մտել՝ պատվերը տանելու, օգտվել զուգարանից։
Հաճախորդը հավելել էր, որ երբ առաքիչն առանց հակաճառելու, որոշել էր ծանր պայուսակները թողնել ռեստորանում և գնալ այլ տեղ կարիքները հոգալու, նրան շատ կոպիտ տոնով զգուշացրել են, որ «պայուսակն էլ վերցնի հետը»:
Երեկ «KIM YUM» ռեստորանի ֆեյսբուքյան էջում հայտարարություն հայտնվեց, որտեղ ասվում էր, թե վերջին օրերին ռեստորանի շուրջ արհեստականորեն աղմուկ է բարձրացել և «տեղի ունեցած դեպքը միակողմանի և սխալ է մատուցվում հանրային տիրույթում»․ «Համացանցում աղմուկ հանած դեպքն ունի իր նախապատմությունը, և տվյալ առաքիչի նկատմամբ վերաբերմունքը պայմանավորված է եղել նրա կողմից մի քանի անգամ սանհանգույցից անբարեխիղճ օգտվելու դեպքերով: Հաշվի առնելով աշխատանքի բնույթը՝ նույն մարդուն մի քանի անգամ ընդառաջել և խնդրել ենք, որպեսզի բարեխիղճ օգտվի սանհանգույցից, բայց ապարդյուն, ինչից հետո արդեն տեղի է ունեցել համացանցում աղմուկ բարձրացած դեպքը»,- նշված էր «KIM YUM» ռեստորանի պարզաբանման մեջ:
Այս հայտարարությունից ժամեր անց իրավիճակին հրապարակային արձագանքեց նաև «Menu.am»-ը, որի հայտարարության մեջ ասվում է, որ ռեստորան/խանութ - առաքիչ - հաճախորդ շղթայում հավասարապես կարևոր են բոլորը, «քանի որ առաքման պրոցեսը չէր իրագործվի առանց նշված կողմերից որևէ մեկի»․ «Ցանկանում ենք հայտարարել, որ մենք դադարեցնում ենք համագործակցությունը KIM YUM-ի հետ՝ պայմանագրով սահմանված կարգով և ժամկետներում։ Տվյալ դեպքն ուղղակի անընդունելի է մեզ համար։ Խնդրում և պահանջում ենք բոլոր գործընկերներից՝ հավուր պատշաճի վերաբերմունք ցույց տալ առաքիչներին։ Նրանք մեր անմիջական ներկայացուցիչներն են»,- ընդգծել էին «Menu.am»-ից։
