A1News.am- SHAMSHYAN.com-ի տեղեկություններով՝ երեկ՝ մայիսի 31-ին, կրակոցներ են հնչել Երևանում։
Ոստիկանության կենտրոնականի բաժնի քրեական հետախուզության բաժանմունքում օպերատիվ տեղեկություններ են ստացվել, որ Վազգեն Սարգսյան փողոցի 26/1 հասցեում գործող «Հրապարակի տակ» փաբում վիճաբանություն է տեղի ունեցել, որի ժամանակ հնչել են կրակոցներ։
Ինչպես հայտնում է ֆոտոլրագրող Գագիկ Շամշյանը, նշված հասցե են ժամանել ոստիկանության կենտրոնական բաժնի ծառայողները, ովքեր պարզել են, որ նույն օրը նշված փաբում ֆինանսական հարցերի շուրջ վիճաբանություն է ծագել Երևանի բնակիչներ՝ 27-ամյա Օնիկ Մարգարյանի և 27-ամյա Մուշեղ Կարապետյանի միջև։ Պարզվել է, որ վիճաբանության ժամանակ Մ. Կարապետյանը իր մոտ եղած ատրճանակից անկանոն կրակոցներ է արձակել, ինչի հետևանքով Օ. Մարգարյանը և ևս 1 հոգի՝ 18-ամյա Վ. Ղ-ն, արձակված գնդակներից մարմնական վնասվածք են ստացել։
Գ. Շամշյանի տեղեկություններով՝ Օ. Մարգարյանը վնասվածքը ստացել է ծնկի, իսկ Վ. Ղ-ն՝ մեջքի հատվածում։ Ոստիկանները Մ. Կարապետյանին հայտնաբերել ու բերման են ենթարկել ոստիկանության կենտրոնական բաժին, ով նաև ներկայացրել է ատրճանակը, որով կրակոցներ է արձակել։ Օ. Մարգարյանին և Վ. Ղ-ին տրվել է դատաբժշկի ուղեգիր, փաստի առթիվ էլ ոստիկանության կենտրոնական բաժնի հետաքննական բաժանմունքում նյութեր են նախապատրաստվում։
Գ. Շամշյանի տեղեկություններով՝ Մ. Կարապետյանը ոստիկաններին հայտնել է, որ ինքը «Հրապարակի տակ» փաբի տնօրենն է։
