A1News.am-Lragir.am-ը գրում է. Ռուսաստանի արտգործնախարար Սերգեյ Լավրովը ապրիլի 26-ի ճեպազրույցի ժամանակ հայտարարել է, թե «Միջազգային հարաբերություններում եկել է անկեղծության պահը։ Որոշվում է հարցը, թե արդյոք մարդկությունը կապրի ՄԱԿ-ի կանոնադրության հիման վրա», ասել է Լավրովը։
ՌԴ-ն, ինչպես նաեւ Չինաստանը, օգտվելով վետոյի իրենց իրավունքից, ՄԱԿ-ը դարձրել են գործիք։ Այդպես Ռուսաստանը վետո դրեց Ուկրաինայի խնդրի քննարկմանը, փոխարենը ներկայացնելով իր նախագիծը։ Այդպես Չինաստանը ՌԴ խնդրանքով 2020-ի հոկտեմբերին վետո դրեց Լեռնային Ղարաբաղում ռազմական գործողությունները դադարեցնելու վերաբերյալ բանաձեւին։
Թե Հայաստանի, թե Ուկրաինայի պարագային խախտվել են ՄԱԿ-ի կանոնադրությունը եւ հիմնարար սկզբունքները, առաջին դեպքում Ռուսաստան-Թուրքիա տանդեմի, երկրորդ դեպքում՝ Ռուսաստանի կողմից։ Լավրովի անունով պլանի մասին խոսելն իսկ ավելորդ է՝ ՌԴ-ն Հայաստանի դեմ պատերազմում հանդես էր գալիս միջազգային հնարավոր ու անհնար բոլոր սկզբունքների խախտման երաշխավոր թուրքերի համար։
Աշխարհում ժամանակին փայլուն դիվանագետի համբավ վայելող Լավրովը ներկայում վեր է ածվել Կրեմլի կլեպտոկրատիայի խղճուկ կցորդի՝ կիսագողական-պացանական ոճով ու ստերով։
