A1News.am-Lragir.am-ը գրում է. Արցախի Ասկերանի շրջանի Խրամորթ գյուղի դաշտերում աշխատող բնակչի վրա Բաքվի զինվորականները երեկ կրակ են բացել։
Այսօր էլ նրանք զինված մտել են նույն գյուղի խաղողի այգիներ եւ սպառնացել, որ գյուղացիներն այլեւս այդտեղ չերեւան։ Երկու միջադեպն էլ տեղի է ունեցել ռուս խաղաղապահների ներկայությամբ։ Ընդհանրապես, վերջին օրերին Արցախում միջադեպերը հաճախացել են, վիրավորվել է հայ զինծառայող։
Ուկրաինայի շուրջ Արեւմուտք-Ռուսաստան լարվածության ֆոնին ենթադրելի էին Արցախում Բաքվի զինված հարձակումները։ Այդ լարվածությունը ստիպում է արագացնել գործընթացները, տվյալ պարագայում՝ «խաղաղ դարաշրջանը», որը ենթադրում է ռուս-թուրքական պլանի իրագործումը՝ պատերազմի արդյունքների ու «Ադրբեջանի» ճանաչում, 1921-ի Մոսկվա/Կարսի պայմանագրերի ճանաչում՝ Նախիջեւանի ու Արցախի օտարմամբ, որին լծվել է Հայաստանի մոսկովյան կատարածու իշխանությունն ու ռուսանպաստ ընդդիմությունը։ Արցախում հայերի ինքնության ու ֆիզիկական գոյության դեմ ռուս-թուրքական արշավը այս ծրագրի բաղադրիչն է։
Պատահական չէ, որ Ուկրաինայի շուրջ իրավիճակի շիկացման եւ աշխարհի առաջատար երկրների իր գործընկերների հետ ինտենսիվ շփումների արանքում Լավրովը ժամանակ է գտել զանգել հայաստանյան իր գործընկերոջը եւ «քննարկել եռակողմ պայմանավորվածությունների կատարման ընթացքը»՝ Եվրա-Ատլանտիկայում հավասար ու անբաժանելի անվտանգության ռուսական պահանջների լույսի ներքո։ Եթե ավելի պարզ՝ Մոսկվան կրկին հավաստում է Հայաստանի վերաձեւման ու ինքնիշխան պետականության վերացման իր կուրսը, որից չի հրաժարվի ոչ մի պարագայում։
Այդպես էր նաեւ Ղազախստանի իրադարձությունների օրերին, երբ «Թուրանին ծանր հարված հասցրած» Ռուսաստանը ստիպված էր արագ դուրս բերել զորքը։
Լրագիրը բազմիցս անդրադարձել է խնդրին, որ Անկախ Հայաստանը սպառնալիք է դիտարկվում Մոսկվայում, նույնիսկ Հայաստանի իշխանության ու խորհրդարանի «ընդդիմության» լիակատար վերահսկելիության, բազմաշերտ ագենտուրայի ու ենթակա զլմ-ների առկայության պայմաններում։ Մոսկվայի այս բարդույթները հատկապես ընդգծվում են «աշխարհքաղաքական ցնցումների» փուլերում։
