Մենք ամենից լավ աշակերտին ենք կորցրել. անգամ ճանճին չէր նեղացնի. մանրամասներ՝ զոհված զինծառայող Էդուարդի մասին. ՖՈՏՈ

A1News.am-Զոհված պարտադիր ժամկետային զինծառայող Էդուարդ Ռուստամյանը Նոր Կյանք համայնքից էր։ Նա տան միակ տղան էր, ուներ 2 քույր։ «Մենք ամենից լավ աշակերտին ենք կորցրել»,- AntiFake.am-ի հետ զրույցում մեծ ցավով ասաց Նոր Կյանքի միջնակարգ դպրոցի տնօրեն Կարինե Հարութունյանը, որի շրջանավարտն էր Էդուարդ Ռուստամյանը։ Նրա խոսքով՝ օրինակելի, սովորող, կարգապահ, պարտաճանաչ, բոլոր լավ մարդկային հատկանիշներով էր օժտված Էդուարդը։ 

«Խոսքը կշռադատված երեխա էր, ոչ մի ավելորդ բան իրեն թույլ չէր տա, սիրված էր ընկերական շրջապատում, ուսուցչական անձնակազմի կողմից։ Ինքը յուրահատուկ երեխա էր, իր մասին վատ ու սխալ լուրեր տարածելը սխալ կլինի։ Էդուարդն իսկապես ոչ մեկին չէր նեղացնի, անգամ՝ ճանճին չէր նեղացնի։ Ինքն ամենից համեստ, ամենից բարի, ամենից հանդարտ, ամենից հետաքրքրասեր աշակերտներից էր»,- կսկիծով շարունակում է տիկին Հարութունյանը։

Տնօրենի խոսքով՝ Էդուարդը հիմնական կրթության վկայականը ստանալուն պես ընդունվել է ԵՊԲՀ քոլեջ՝ հետագայում բժշկական կրթությունը շարունակելու նպատակով։ Այնտեղ նա նույնպես բարձր առաջադիմություն է ունեցել։ Հետո նա մտափոխվեց՝ ուզում էր դառնալ ծրագրավորող, այնտեղ էլ Էդուարդը հաջողություններ ունեցավ։ «Նրա մոտ բոլոր առարկանները ստաացվում էին, ամեն ինչ էր ստացվում, նրա մասին միայն դրական խոսքեր կարող եմ ասել»,- եզրափակեց տնօրենը։

Ինչպես հայտնի է՝ այսօր մարտի 17-ին, ժամը 10:30-ի սահմաններում, հանրապետության հարավային ուղղությամբ տեղակայված զորամասերից մեկի տարածքում հայտնաբերվել է 2003թ․–ին ծնված ժամկետային զինծառայող, շարքային Էդուարդ Ռազմիկի Ռուստամյանի դին` հրազենային վիրավորումով: