A1News.am-Բրազիլիայում գեղեցիկ տոների շարքին է պատկանում հայրերին նվիրված տոնը: Այդ տոնից ամեն տարի անմասն չեն մնում նաև մեր հայրենակիցները: Բրազիլիայի հայոց թեմի տեղեկատվական բաժնից տեղականում ենք, որ տոնը հանդիսավոր կերպով նշվել է Սան Պաուլոյի առաջնորդանիստ Սուրբ Գևորգ Մայր Տաճարի մեջ: Թեմակալ առաջնորդ Գերշ. Տ. Նարեկ եպս. Բերբերյանի հանդիսապետությամբ հավարտ սուրբ պատարագի հայրերին նվիրված հատուկ աղոթք է կատարվել: Աղոթքի ժամանակ տեղի է ունեցել մոմավառություն, որի ժամանակ ընթերցվել են նաև հավատացյալների կողմից նախապես ուղարկված իրենց հայրերի անունները: Բրազիլահայոց թեմի առաջնորդը անդրադարձել է բոլորիս կյանքում ծնողների դերի ու նշանակության կարևորությանը:
Որդյակ իմ, ՀՈՐԴ խրատը լսիր ու ՄՈՐԴ օրենքը մի մերժիր»
Առակաց Ա 8:
Այս տողերը իբրև բնաբան սրբազան հայրը քարոզել է. «Սիրելի ժողովուրդ, մենք որքան էլ մեծանանք, մեր ծնողների համար մնալու ենք միշտ երեխա: Անգին է այն սերը, որ անհատույց կերպով մեր ծնողներից մշտամնա ստացել ենք: Շատերիս կյանքում այսօր այդ ծնողի՝ գուրգուրանքի, սիրո և ջերմության կարիքը առավել ևս զգացողական է: Նրանք են մեր հիմնասյունները, որոնց կարող ես տալ ամեն բան և ամեն բան էլ նրանցից ստանալ: Սուրբ Գրքի բազմաթիվ տողերում Աստված մեզ համար Հայր է:
Հենց այնպես չի եղել, որ Աստված ցանկացել է, որպեսզի իր սեփական ժողովուրդը իրեն հայր անվանի, թերթեք և կտեսնեք քանի համարներում է Աստված հայրաբար մոտենում մեր մեղքերին, քանի ու քանի ավետարանական դրվագներում մեր մեղքերի հանդեպ Քրիստոս հոր դերում է, իսկ մենք՝ երեխանների: Շնորհավորում եմ բոլոր հայրերի տոնը, թող Ամենակարող Աստված երկար-երկար տարիների քաջառողջ կյանք պարգևի բոլոր հայրերին: Սիրեցե´ք և անքակտելի կապով միշտ միացած եղեք ձեր ծնողներին: Մեր կյանքից ներս հայրը ամենից լավ ընկերն է, վստահեք նրան, և փորձեք ձեզ կյանք պարգևող հորը Աստծու չափ սիրել և նրանից մի քայլ իսկ երբեք չհեռանալ»- ասված է սրբազան հոր խոսքում: Տեղեկացնում ենք, որ ամբողջ աշխարհում հայկական ամենամեծ գաղութներից մեկը գտնվում է հենց Բրազիլիայում, այստեղ գրեթե 35-40 հազար հայեր են ապրում՝ հիմնականում գաղթած Մարաշից, Հաճնից և Սսից: Հայ Առաքելական եկեղեցու Բրազիլահայոց թեմը՝ Նարեկ Եպիսկոպոս Բերբերյանի առաջնորդության տարիներին հայ համայնքի կյանքում բազմաթիվ կարևոր ծրագրեր է իրականացնում: Հոգևոր և ազգային անգին տարրերը միահյուսված հրամցվում են երիտասարդներին՝ նպատակ հետապնդելով նրանց ամուր կապելու Մայր եկեղեցուն և Մայր Հայրենիքին: Բրազիլիայում գործում է երկու հայկական եկեղեցի՝ Օզասկոյի Սուրբ Հովհաննես Մկրտիչ եկեղեցին և հայաշատ Սան Պաուլո քաղաքի առաջնորդանիստ Սուրբ Գևորգ Մայր Եկեղեցին: Տեղեկացնում ենք, որ Բրազիլիայում մայրերի տոնը նույնպես մեծ հանդիսավորությամբ է նշվում:
