A1News.am-Ուկրաինան հայտնել է «Նեպտուն» թեւավոր հրթիռներով Ռուսաստանի Սևծովյան նավատորմի դրոշակակիր «Մոսկվա» հրթիռային հածանավին հարվածելու մասին։ ՌԴ ՊՆ-ն հաստատել է տեղի ունեցած հրդեհն ու պայթյունը, սակայն չի նշել դրանց պատճառը։
Հածանավը 1164 «Ատլանտ» նախագծի առաջատար նավն է։ Այն կառուցվել է խորհրդային տարիներին Ուկրաինայում՝ Նիկոլաեւ քաղաքի նավաշինարանում, գործարկվել է 1982 թվականին և ի սկզբանե կրել է «Սլավա» անունը։ Ի դեպ, ներկայում ռուսական զորքը գրոհում է Նիկոլաեւ քաղաքը։
Նավը մասնակցել է Մալթայում 1989 թ. ԽՄԿԿ գլխավոր քարտուղար Միխայիլ Գորբաչովի ԱՄՆ նախագահ Ջորջ Բուշի գագաթնաժողովի «ուղեկցմանը»։
2000 թվականին արդեն «Մոսկվա» անվան տակ նավը դարձավ Ռուսաստանի ռազմածովային նավատորմի Սևծովյան նավատորմի դրոշակակիրը։ Հածանավը մասնակցել է մի շարք զինված հակամարտությունների, այդ թվում՝ Սիրիայում ռուսական օպերացիային։ Դրանից հետո նավը մի քանի տարի վերանորոգվել է։
ՌԴ նախագահ Վլադիմիր Պուտինը բազմիցս եղել է նավի վրա, օտարերկրյա առաջնորդների հետ, այդ թվում՝ 2000 թ. Ուկրաինայի նախագահ Լեոնիդ Կուչմայի հետ։
Նավի անձնակազմը 510 հոգի է, երկարությունը՝ 190 մետր։ Այն համալրված է թեւավոր հրթիռների համալիրով, մի քանի զենիթահրթիռային համակարգերով, հրետանային և հականավային զենքերով։
ԱՄՆ ռազմածովային քոլեջի պրոֆեսոր Մայքլ Պետերսենը BBC-ին ասել է, որ ուկրաինացիները մեծ հաղթանակ են տարել ծովում: «Կարծում եմ՝ դա ունի և խորհրդանշական, և ռազմական նշանակություն», ասել է նա։
Ուկրաինացիները կորցրել են իրենց նավատորմը 2014 թվականին՝ Ղրիմի բռնակցումից հետո, ուստի, Պետերսենի կարծիքով, հենց այն փաստը, որ ուկրաինացիները կարող են նման հարվածներ հասցնել, չափազանց խորհրդանշական և ցավալի է Ռուսաստանի ղեկավարության համար։
Փորձագետի կարծիքով՝ տեղի ունեցածը կարող է ունենալ նաև ռազմական նշանակություն, քանի որ այժմ ռուսական նավատորմը կարող է ուկրաինական ափից ավելի մեծ հեռավորության վրա գործելու անհրաժեշտություն զգալ։
«Դա կարող է ազդել զորքերի անմիջական կրակային աջակցության և ափամերձ տարածքների հակաօդային պաշտպանության ունակության վրա: Կարծում եմ, որ դա կստիպի ռուս նավաստիներին երկու անգամ մտածել», ասել է Մայքլ Պետերսենը:
