A1News.am-Hayeli.am-ը գրում է. Կառավարության նիստում Նիկոլ Փաշինյանը պարզաբանումներ է ներկայացրել երեք օր առաջ ՀՀ Անվտանգության խորհրդի 2022 թվականի մարտի 28-ի հայտարարության վերաբերյալ, << որպեսզի թե՛ հայաստանյան, եւ թե՛ միջազգային հանրության համար տարածաշրջանում հաստատված իրադրությունը առավել պարզ լինի>>:
ՀՀ կառավարության ղեկավարի կողմից արձանագրում է արվել, որ ադրբեջանական կողմը ահաբեկչությունների է դիմում և ոտնահարում է արցախահայության իրավունքները։ Նա նաև անդրադարձել է Հայաստանի եւ Ադրբեջանի միջեւ խաղաղության պայմանագրի թեմային՝ նշելով, թե մարտի 10-ին Ադրբեջանի կողմից Հայաստանին փոխանցված 5 կետանոց առաջարկներում իրենց համար անընդունելի ոչինչ չկա։ Փաշինյանը մեջբերելով Արարատ Միրզոյանի խոսքը՝ նշել է, թե ԵԱՀԿ ՄԽ համանախագահությանը փոխանցված պատասխանում հայկական կողմը լրացում է կատերել առաջարկված օրակարգում և պատրաստ է խաղաղության բանակցությունների մեկնարկին։
<< Ադրբեջանի դիրքորոշումն այն է, որ Լեռնային Ղարաբաղի հիմնախնդիր չկա, այն այլեւս լուծված է: Բաքվի այս դիրքորոշումը չի պատասխանում սակայն մի կարեւոր հարցի. իսկ ինչպես է այդ դեպքում լուծվել Լեռնային Ղարաբաղի հայության իրավունքների հարցը: Այս հարցի պատասխանը չկա >>,- նշել է Նիկոլ Փաշինյանը և ավելացրել, թե Ադրբեջանը փորձում է ոչ թե լուծել այդ հարցը, այլ փակել այն։ Արցախի հարցի փակման գործողությունը, ըստ Փաշինյանի՝ մեկնարկել Ասկերանի շրջանի Փառուխ գյուղից, որը շարունակվելու ակնհայտ միտում ունի: <<Ադրբեջանը, ըստ էության, փորձում է բոլոր հայերին տեղահանել Լեռնային Ղարաբաղից, այդպիսով հարցը փակված համարելու համար>>,- ասել է նա և ավելացրել, որ Ադրբեջանը վարում է Արցախն առանց հայերի թողնելու քաղաքականություն։
Փառուխի ճգնաժամը, ըստ էության, ծագել է պայմանավորվածությունների խախտման արդյունքում: <<Տարածաշրջանում լարվող իրադրությունը թուլացնելու համար ձեռք էր բերվել պայմանավորվածություն՝ Փառուխ-Խրամորթ հատվածից մի շարք դիրքեր հայելային կերպով հանելու վերաբերյալ եւ այս պայմանավորվածությունը պիտի երաշխավորեր ՌԴ խաղաղապահ զորախումբը: Հայկական մի քանի դիրքեր ետ են քաշվել, Ռուսաստանի խաղաղապահները տեղակայվել են նշված հատվածում, սակայն նրանց աչքի առաջ ադրբեջանցիները ներխուժել են խաղաղապահների պատասխանատվության գոտի:
Մենք ցավով ենք արձանագրում սա եւ այն, որ չնայած Ռուսաստանի Դաշնության Պաշտպանության նախարարության, ԱՄՆ, Ֆրանսիայի, ՄԱԿ-ի հստակ հայտարարություններին ադրբեջանական զինված ուժերի ստորաբաժանումների ներխուժումը Լեռնային Ղարաբաղում Ռուսաստանի Դաշնության խաղաղապահ զորախմբի պատասխանատվության գոտի այսօրվա դրությամբ շարունակվում է:
Մենք ակնկալում ենք, որ Լեռնային Ղարաբաղում ՌԴ խաղաղապահ զորախումբը կոնկրետ քայլեր կձեռնարկի ադրբեջանական ստորաբաժանումների դուրսբերումը խաղաղապահների պատասխանատվության գոտուց ապահովելու եւ 2020 թվականի նոյեմբերի 9-ի եռակողմ հայտարարությամբ արձանագրված ստատուս քվոն վերականգնելու համար>>,- հայտարարել է Նիկոլ Փաշինյանը:
Փաշինյանը նաև խոստավանել է, թե նոյեմբերի 9-ի հայտարարության 9-րդ կետի կատարման նպատակով հայկական կողմը պարտավորվել է վերակառուցել Երասխ-Ջուլֆա-Օրդուբադ-Մեղրի-Հորադիզ երկաթուղին, վերաբացել կամ կառուցել ավտոմոբիլային ճանապարհ, որը նաև կկապի Ադրբեջանի արեւմտյան շրջանները Նախիջեւանի հետ՝ սահմանային անցման կետերում իրականացնելով սահմանային, մաքսային եւ այլ հսկողություններ: Փաշինյանն ասել է, որ չկա որևէ երաշխիք, որ Հայաստանի կողմից նոր ճանապարհի և երկաթուղու կառուցումից հետո Ադրբեջանը կհրաժարվի բացել սահմանը: << Եւ կստացվի, որ մի քանի հարյուր միլիոն դոլար ներդրում պահանջած ենթակառուցվածքներից չի կարողանա օգտվել ոչ Հայաստանը, ոչ Ադրբեջանը, ոչ երրորդ երկրները եւ Հայաստանը պարզապես կկորցնի մի քանի հարյուր միլիոն դոլար>>,- ասել է Փաշինյանը։
Նման արձանագրումներից հետո Նիկոլ Փաշինյանն առնվազն պետք է հայտարարեր, որ խաղաղության օրակարգը տապալված է՝ Ադրբեջանի հակահայ գործողությունների պատճառով։ Բայց Փաշինյանը նման բան չի արել։ Ավելին խոսքի ավարտի կրկին անգամ կրկնել է, որ պատրաստ է Ադրբեջանի հետ ստորագրելու խաղաղության պայմանագիր:
Իր ելույթում նա ըստ էության հայ ժողովրդին նախապատրաստել է իր կողմից ստորագրվելիք խաղաղության պայմանագրի հայատյաց կետերին, թերևս որ իրեն հետագայում չասեն՝ դավաճան։
Նա ի սկզբանե ասում է, որ գնալու է դավաճանության։ Եթե այսքանից հետո նա դեռևս շարունակում է պահպանել ՀՀ անունից ինչ-որ թուղթ ստարագրելու իրավունքը, կնշանակի հայ ժողովուրդը նրան տվել է նման լիազորություն։
Մի պարզ նկատառում ևս․ ի՞նչ երաշխիք կա, որ խաղաղության պայմանագրի կետերը Ադրբեջանը պահպանելու է։
